Allanyń atymen bastaımyn!
Qadirli baýyrlar, otandastar!
Barshańyzdy ısi musylman qaýymy asyǵa kútken qasıetti ramazan aıynyń kelýimen quttyqtaımyn. Orazaǵa aman-esen jetkizgen Alla taǵalaǵa sansyz shúkirler men maqtaý-madaqtar bolsyn! Ár otbasyna amandyq, baqyt pen bereke tileımin! Jaratýshy Alla jar bolsyn!
Bizdiń halqymyz aýyz bekitken adamdy aıryqsha qadirlep, oǵan aýyzashar berip, qurmet kórsetken.
Ramazan – jaqsylyqtyń saýaby eselenip jazylatyn aı. Orazada árbir ıgi amaldyń saýaby eselenip jazylady. Qudsı hadıste Alla taǵala: «Oraza – tek Men úshin. Onyń syıyn (saýabyn) О́zim ǵana beremin...» – dep orazanyń qadiri men qasıetin, máni men mańyzyn baıandaǵan.
Al ardaqty paıǵambarymyz Muhammed (oǵan Allanyń salaýaty men sálemi bolsyn) óziniń hadıs-sharıfinde: «Adam balasynyń barlyq ıgi isteriniń saýaby artady. Árbir jaqsylyqqa on eseden jeti júz esege deıin saýap jazylady», – dep úmbetine súıinshi habar jetkizgen.
Osy rette otandastarymdy qaıyrymdylyq is-sharalarǵa belsendi atsalysýǵa, kásipker azamattardy ramazannyń qurmeti úshin azyq-túlik pen kúndelikti turmysqa qajetti zattarǵa arnaıy jeńildikter jasaýǵa shaqyramyn. Qudaıy astar men sadaqalar aýyzashar ýaqytynda uıymdastyrylsa degen tilegimdi bildiremin.
О́zderińizge belgili, elimizde kóp balaly otbasylar men jastarǵa kóńil bólinip, birqatar memlekettik baǵdarlamalar júzege asýda. Memlekettiń ıgi bastamalaryna ún qosý – barsha azamattyń asyl boryshy.
Izgi amaldyń saýaby eselenip jazylatyn aıda kóp balaly otbasylarǵa qoldaý kórsetip, qarııalar men múgedek jandardyń, jalǵyzbasty analardyń batasyn alyp, alǵysyna bólenýge úndeımin. Jetimder men naýqas adamdarǵa qamqorlyq jasaıyq!Bir adamdy qýanyshqa bóleý – sadaqa. Qazaqstan musylmandary dinı basqarmasynyń negizgi jumys baǵyttarynyń biri – qaıyrymdylyq sharalarǵa uıytqy bolý. QMDB qyzmeti aıasynda «Islam jáne otbasy» jyly bastamasy negizinde demeýshi azamattardyń qoldaýymen baspanaǵa asa muqtaj 15 januıaǵa páter kilti tabystaldy. Bul baǵytta izgi sharalar júzege asa beredi.
Birde súıikti paıǵambarymyz Muhammedten (oǵan Allanyń salaýaty men sálemi bolsyn) bir kisi: «Ýa, Allanyń Elshisi, eń jaqsy adam kim?» – dep suraǵanda, ol: «Eń jaqsy adam – qoǵamǵa, elge paıdasy tıgen pende», – dep jaýap bergen eken.
Zeket berý – jaǵdaıy kelgen (sharıǵat boıynsha nısap mólsherine jetken) musylmanǵa paryz. Al zeket berekeli ramazan aıynda berilse, onyń da saýaby eselenip jazylady.
Qurmetti jamaǵat!
Ramazan aıy qutty bolsyn! Qasıetti aıda ustaǵan orazalaryńyz, jasaıtyn qulshylyq, duǵa-tilekterińiz qabyl bolsyn! Alǵa qoıǵan arman-maqsattaryńyz oryndalyp, orazadan orazaǵa aman-esen jete berýimizdi Alla násip etsin! Elimiz aman, jurtymyz tynysh, táýelsizdigimiz baıandy bolǵaı! Áýmın!Serikbaı qajy ORAZ,
Qazaqstan musylmandary dinı basqarmasynyń tóraǵasy, Bas múftı