Halqynyń jaqsy atyn shyǵarǵan

Halqynyń jaqsy atyn shyǵarǵan

Senbi, 4 mamyr 2013 3:12

О́zbekstanda júrip Eńbek Eri atanǵan azamattyń ómiri týraly syr

Myrzashól – Syrdarııanyń joǵarǵy boıynyń sol jaǵyn alyp jatqan qumdy atyrap. Onyń soltústik jaǵy Ońtústik Qazaqstan oblysyna, ońtústigi О́zbekstan Respýblıkasyna qaraıdy. Qyzylqumǵa ulasatyn qazaqstandyq Myrzashól qum tóbeli bel-belesti jazyq.

Senbi, 4 mamyr 2013 3:12

О́zbekstanda júrip Eńbek Eri atanǵan azamattyń ómiri týraly syr

Myrzashól – Syrdarııanyń joǵarǵy boıynyń sol jaǵyn alyp jatqan qumdy atyrap. Onyń soltústik jaǵy Ońtústik Qazaqstan oblysyna, ońtústigi О́zbekstan Respýblıkasyna qaraıdy. Qyzylqumǵa ulasatyn qazaqstandyq Myrzashól qum tóbeli bel-belesti jazyq. Myrzashól óńirin ıgerý KSRO-da HH ǵasyrdyń 20-jyldary Túrkistan óńirin sýlandyrý jáne sýarmaly eginshiliktiń aýmaǵyn ulǵaıtý maqsatynda júrgizilgen ırrıgasııalyq jumystardan bastaldy. Ekinshi dúnıejúzilik soǵystan keıingi jyldary Myrzashól óńirinde Shardara sý qoımasy, Qyzylqum sýarý júıesi sııaqty jasandy aıdyndar iske qosyldy jáne bulardyń negizinde Myrzashóldi sýlandyrý kesheni qalyptastyryldy.

Aty aıtyp turǵandaı, bul atyrap bir kezde qumnyń qýań shópteri men jándikteri ǵana ómir súretin shól bolǵan. Janynan sylq-sylq kúlip aǵyp jatqan Syrdarııa qańsyp jatqan shólge bir tamshy sýyn da bermeı, Aralǵa jetetin. Osy darııany túrli sý qoımalarymen bógep, shólge burý arqyly maqta egisi qolǵa alynǵan. Ushqan qustyń qanaty kúıetin mı qaınatar ystyqta adamdar qara shoıyndaı bolyp totyǵyp, qara qaıystaı bolyp shırap, Syrdarııanyń sýyn kanaldarmen buryp, aq shóldi aq altyndy al­­­qapqa aınaldyryp, «myrza shól» atan­dyrdy. Sol erlerdiń biri bizdiń keıipkerimiz Qynabek Úkibaıuly edi.

Ol 1913 jyly burynǵy Syr­darııa oblysy Iirjar bolysy, ıaǵnı qazirgi Ońtústik Qazaqstan oblysynyń Maqtaaral aýdanynda týǵan. Iirjar 1928 jyly burynǵy bolystyqtyń negizinde qurylǵan aýdan bolatyn. 1930 jylǵy 17 jeltoqsannan ol Maqtaaral aýdany atalady. Aýdan О́zbekstannyń Syrdarııa jáne Jyzaq oblystarymen shektesedi.

Qynabektiń ákesi Úkibaı kedeı sharýa bolǵan. Ol 1910-13 jyldary Myrzashól kanalyn qazýǵa qatysqan jandardyń biri. Úkibaı men Zıbadan Dildábek, Qynabek esimdi uldar men Saparkúl, Tumar, Túımekúl atty qyzdar ómirge kelgen.

Q.Úkibaevtyń arǵy atasy Qara­mende «túıe qabyrǵaly Qa­ra­­kóse» atanǵan ataqty balýan, qara kúshtiń ıesi kórinedi. Aýyl-aımaqty aqyldy qarııalar bas­qaryp, baýyrmaldyq pen týys­tyqtyń qadasy nyq bolǵan kezeńdi Qynabek kórip ósedi. Sol aqylman qarttardyń arasynan Bekbota, Túrkebaı, Ospan sekildi atalarynyń halyqqa jasaǵan paıdaly isterin, úlgi-ónegesin boıyna sińirip, óz tarapynan olardyń jarqyn esimderin urpaqtaryna jetkizýge tyrysady. Sondaı-aq, Keńes Odaǵynyń Batyry To­ǵambaı Qaýymbaev, aqyn Musa Jumanazaruly, Qara Aǵaıdaruly sekildi aýyldas, aǵaıyndas tustas­taryn da ol jastarǵa úlgi tutyp, aýzynan tastamaı aıtyp júrgen.

Osyndaı ortadan shyqqan Qynabek jasynan belsendi, onyń ústine elmen sanasatyn juǵymdy azamat bolyp qalyptasady. Mek­tep­ten keıin traktorshylyq kýrs­ty bitirgen bozbalany aýyldas­tary 18 jasynan bastap maqta brıgadıri jumysyna saılaıdy. Al 1935 jyly aýdan basshylary qolynan is keletinin kórip, ony Qyzylabad aýyldyq keńesiniń tóraǵasy qyzmetine bekitedi. Bul О́zbekstan jerindegi Myrzashól aýdanyna qarasty jer bolatyn.

Osy qyzmetti abyroımen atqa­ryp júrgeninde Uly Otan soǵysy bastalady. Ol kezde mundaı qyzmet atqaratyn laýazymdy adamdarǵa bron berilip, soǵysqa almaıdy. Biraq maıdan dalasyndaǵy dúbir, keńestik úgittiń «Qyzyl Ar­mııanyń erlikke toly isterin» asyra baǵalaǵan nasıhaty jas jigittiń de búıirin qyzdyryp júredi. Sóıtken kúnderdiń birinde, 1942 jyly Myrzashól aýdandyq partııa komıtetiniń bıýrosynda Qynabek Úkibaevtyń jumysy esh negizsiz, qatty synǵa alynady. Buǵan shamdanǵan namysty jigit birden áskerı komıssarıatqa baryp, soǵysqa jiberýdi ótinip, aryz beredi. Buǵan deıin de birneshe suranǵan eken, biraq ol kezde jiber­megen áskerı komıssar jas jigittiń bul joly qatty bekingenin kórip, qarsylyq jasaı almaıdy. Sóıtip, aýyldaǵy ata-anasymen de qoshtaspaı, Túrkimenstannyń Krasnovodsk qalasyna júrgeli turǵan áskerı eshelonǵa minip, soǵysqa kete barady.

Q.Úkibaev óziniń estelik kita­bynda osy oqıǵaǵa qatysty oılaryn bildiripti. Onda óziniń balalyq jasap, ata-anasyna qatty ýaıym salyp, ún-túnsiz ketkeni úshin ózin ózi qatty sókkenin jazady. «Osyndaı da meıirimsiz, shapaǵatsyz perzent bola ma? – dep ózimdi ózim balaǵattaı bastadym. Ata-anany zar qaqsatyp, dostardy jylatyp, dushpandardy kúldirip soǵysqa attanǵanym ne? Bir-eki aqymaq jamandaǵanmen jaman bolyp qalmaıtyn ediń ǵoı. Qoryqqanynan ózin-ózi janyp turǵan otqa tastady demeı me?» degen oılar oǵan maza bermeıdi. Biraq endi bári de kesh ekenin eskerip, er qorǵany – táýekelge bel býyp, aldaǵy kún­derge úmitin jalǵastyrady.

Krasnovodsk qalasyndaǵy po­lıgonda 45-50 gradýstyq ys­tyqta júrip, alǵashqy áskerı da­ıyndyqtan ótken munyń orta bilimi jáne aýyldyq keńesti basqarǵan tájirıbesi baryn kórgen komıssııa Reseıdiń Ivanovo qalasyndaǵy áskerı-saıası oqý ornyna jiberedi. Osy jerden rotanyń saıası qyz­metkeri ataǵyn alǵan Q.Úkibaev kópten ańsaǵan maıdanǵa tartady…

Bul 1943 jyldyń basy edi. Bul kezde Q.Úkibaevtyń rotasy qaraıtyn 3-shi Ýkraına maı­da­nynyń jaýyngerleri osy respýblıkanyń qalalary men aýyldaryn jaý qolynan bosatýda bolatyn. Qan maıdan na­ǵyz qyzyp jatqan tus. Biraq, «qyryq jyl qyrǵyn bolsa da ajaldy óledi» degendeı Qynabek Úkibaıuly Ýkraına jeri úshin arpalysyp, odan Vengrııa, Rýmynııa, Iýgoslavııa men Avstrııany fashısterden azat etý jolyndaǵy keskilesken shaıqastarǵa qatyssa da denesine bir oq darymaı aman qalady. Janymdaǵy joldastarym qynadaı qyrylyp jatqanda qalaı aman qalǵanyma ózim de keıde tańǵalamyn, dep eske alady ol artynan. Keıde elde júrip istegen talaı qaıyrymdy isterimniń óteýine aman qalǵan shyǵarmyn dep te oılaıdy eken. 1936 jyly GPÝ bireýlerdiń kórsetýimen eldegi molda, ımam, ıshandardy qýdalap, ustaýǵa shyqqanda bul bir joldastarymen birge qabir mańynan jertóle qazyp, olardyń 15 shaqtysyn jasyryp, aman alyp qalady. Izdep kelgen qanisherlerge aýyldyq keńestiń tóraǵasy retinde jaýap berip, ondaı adamdardyń munda joq ekendigine ılandyrady. Mine, osy kisilerdiń bergen batasy men dýasy saqtap, saýaby tıdi me eken dep oılaıdy artynan Qynekeń.

1946 jyly keýdesi orden-me­­daldarǵa tolǵan Q.Úkibaev maı­dannan elge aman oralady. So­­­nyń ishinde Dýnaı ózeninde bol­ǵan bir shaıqastaǵy erligi úshin marapattaǵan «Qyzyl Juldyz» ordeni aıryqsha jarqyraıdy.

Myrzashól aýdanynyń jer­gilikti bıligi mundaı bilikti, belsendi ári batyl adamdarǵa shóldep otyrsa kerek, maıdangerdi birden Pýshkın atyndaǵy keńshardyń (Boltaı aýyly) tóraǵalyǵyna taǵaıyndaıdy. Aýdannyń birinshi hatshysy Abdýl­haı Taırov Qynabek Úkibaıulymen buryn túrli kýrstarda birge oqyǵan, tanys­tyǵy dostyqqa ulasqan jigit eken, ol surapyl soǵystan aman qaıtqan dosyn qushaq jaıyp qarsy alady. Aıta keteıik, osy A.Taırov – О́zbekstan Respýblıkasynyń bel­gili memleket jáne partııa qaı­­­rat­keri bolǵan adam. Keıin ol Sýrhandarııa oblysy atqarý ko­­mıtetiniń tóraǵasy, Buqara, Na­manǵan oblystarynyń birinshi basshysy qyzmetterine saılanǵan jan.

Jalyndaǵan jas, onyń ústine ótkir ári bilikti basshy Q.Úkibaev az jyldyń ishinde artta qalǵan sharýashylyqty aldyńǵy qatarly lekke qosady. Keıin bul ujymshar «Sosıalızm» keńsharynyń bir bólimshesi bolyp qalady. Qolynan is keletin Úkibaevty oblys Taırov­tyń usynysymen aýdandyq atqarý komıtetiniń tóraǵasy qyzmetine kóteredi. Al 1950 jyly Taırov Sýrhandarııa oblystyq atqarý komıtetine aýysqanda ornyna Úkibaevty usynyp ketedi. Sóıtip, óziniń iskerligi men jaqsy dostyń qoldaýynyń arqasynda Q.Úkibaev az jylda aýdan basshysy bolyp úlgeredi.

Osy, 1950 jyldan 1960 jylǵa deıin Q.Úkibaev Myrzashól aýdan­dyq partııa komıtetinde birinshi hatshy bolyp qyzmet etti. Tabıǵaty barynsha qatal, jazy mı qaınatar ystyq, shóldi atyrap Qynekeń basqarǵan jyldarda túlep sala berdi. Maqtadan gektaryna 28-30 sentnerden ónim alynyp turdy. О́zbekstannyń taǵy bir qaıratkeri, birneshe jyl respýblıkanyń birinshi basshysy bolǵan, keıin uzaq jyldar KSRO-nyń Sırııadaǵy elshisi qyzmetin atqarǵan Nýrıd­dın Mýhıtdınovtyń aıtýyna qaraǵanda, Myrzashól aýdany Qynekeń basqarǵan jyldarda respýblıkada aldyńǵy qatarǵa shyǵyp, jyl saıyn ókimetke 70 myń tonnaǵa deıin maqta berip turypty. Osy eńbegi úshin 1956 jyly Q.Úkibaevqa Sosıalıstik Eńbek Eri ataǵy beriledi. Sondaı-aq ol KSRO jáne О́zbek KSR Joǵarǵy Keńesteriniń depýtaty, partııa Or­ta­lyq komıtetiniń múshesi bolyp saılanady. Bul О́zbekstandaǵy qazaqtar arasynan qol jetkize qoıýy qıyn jetistikter edi.

1960 jyly Qynekeń Bostandyq aýdanyna birinshi hatshy bolyp aýysady. Bul aýdan 1956 jylǵa deıin Ońtústik Qazaqstan oblysynyń ákimshilik quramyna qarap kelgen. 1956 jylǵy 13 aqpandaǵy KSRO Joǵarǵy Keńesi Tóralqasynyń Qazaq KSR-i men О́zbek KSR-iniń shekaralaryna jekelegen ózgerister engizý týraly qaýlysymen aýdan túgelimen, búkil qazaq halqyn ókinishte qaldyryp, Qazaq KSR-inen О́zbek KSR-i quramyna berilgen edi.

Mine, osy aýdandy Q.Úkibaev eki jyldaı basqarady. Osy jyldary Myrzashóldiń jańa aı­maqtary ıgeriletin bolady. Onyń aýmaǵy Qazaq, О́zbek jáne Tájik respýblıkalarynyń quramyndaǵy jerlerdi qamtıtyn. KSRO sý sharýa­shylyǵy jáne melıora­sııa mınıstrligine qaraıtyn «Glav­golodnostepstroı» atty odaq­tyq bas basqarma qurylady. Onyń bastyǵy Akop Sarkısovtyń shaqyrýymen 1962 jyly Qyne­keń №17 keńshardyń (qazirgi Sar­doba aýyly) dırektory bolyp taǵaıyndalady. Bul keńshar ter­rıtorııalyq baǵynysy jaǵynan Qazaqstanǵa qaraıtyn, sondyqtan Úkibaev sol kezdegi Ońtústik Qazaqstan obkomynyń birinshi hatshysy V.Lıvensovtyń batasyn alady…

Osy jerde Q.Úkibaevtyń estelik kitabynan bir derekti keltire ketelik. Men keńsharǵa kelsem ortalyq kenttegi jumysshylarǵa arnap salynǵan úıler eki qabatty 8-10 páterlik eken, dep eske ala­dy ol. Jumysshylar qala turǵyndary qusap jumys ornyna kóliktermen qatynap, keshke páterlerine tyǵylatyn kórinedi. Aýylda turyp tamaqtyń bárin dúkennen satyp alady. Bul da aýyl turǵyndary men qala turǵyndaryn teńeımin degen hrýshevtyq aqy­maq ıdeıanyń bir kórinisi edi. Osyǵan Q.Úkibaev birden qarsy shyǵady. Sóıtip, «Glavgolodnostepstroı» basshylary A.Sarkısov, E.Ozer­­skıılermen talaı ret aıtysýǵa týra keledi. Tek Hrýshev ketkennen keıin ǵana Q.Úkibaevtyń ıdeıa­sy durystyqqa jetip, jergilikti turǵyndarǵa yńǵaıly bir qabatty úıler salyný qolǵa alynady.

1963 jyly Ońtústik Qazaqstan oblysynyń maqta ósiretin Maqta­aral, Jetisaı jáne Kırov atty úsh aýdany taǵy da sol urdajyq Hrýshevtiń sheshimimen jergilikti halyqtyń pikirimen sanaspaı О́zbek KSR-i quramyna berilip ketken (Olar tek 1971 jyly qaıtaryldy). Q.Úkibaev basqaratyn №17 keńshar aýmaǵy da tutasymen sonyń ishinde ketip, О́zbek KSR-ine qarap qalady.

Osy keńsharda 14 jyl dırektor bolǵan bilikti basshy bıik tabystarǵa qol jetkizedi. 1963 jyly memleketke 6 myń tonna maqta tapsyrsa, 1973 jyly bul kórsetkish 12 myń tonnaǵa jetedi. Keńsharda Q.Úkibaevtyń qol astynda qyzmet istegender arasynan bir mınıstr, eki aýdan basshysy jáne ondaǵan kásiporyn basshylary shyǵady. Olardyń bári de Qynekeńe degen rızashylyǵyn kúni búginge deıin aıtyp, aýzynan tastamaıdy. Máselen, keıin О́zbek KSR Aýyl sharýashylyǵy mınıstri bolǵan Rýstam Karımov Q.Úkibaevty: «Qynekeń qajymas qýattyń, erekshe eńbek qabiletiniń, ustamdy aqyldyń jáne aıryqsha iskerlik qadir-qasıetterdiń, kúshti lıderlik sapalardyń egesi boldy. О́ziniń jumystaǵy qataldyǵyna qaramastan basqalarǵa tilektes, adamgershiligi jáne baýyrmaldyǵy mol adam edi. Meniń taǵdyryma Qynabek atanyń basshylyǵynda jumys isteý baqyty jazylǵanyna rızamyn», dep eske alady.

Qynabek Úkibaıulynyń ózi de ómirde talaı jaqsyny ustaz tutyp, úlgisin alǵan, al keıbirimen dám-tuzdary jarasyp, jaqyn kóńilmen dostyq qatynasta bolǵan.

Biraz qazaq ózbek jerinde Qy­­nabek Úkibaıulyn panalap, qýǵyn­nan da aman qalǵan. Solardyń biri – aqtóbelik Ǵazym Sársenǵalıev. Saýda salasynda istep júrgen ol óz elinde bir keleńsiz jaǵdaıǵa ushyrap, Tashkent asýǵa májbúr bolady. Sodan… «Tashkannyń kóp shaıhanalarynyń» birinde ózbek akalarmen áńgimelesip otyryp, osy jaqta maǵan pana bolarlyq bir myqty qazaq bar ma dep suraıdy. Sonda aqsaqaldardyń biri: Tash­kent-Krasnovodsk poıyzyna oty­­­ryp, júz shaqyrym jerdegi Myr­zashól stansasynan tús, sonda aýdan ustap otyrǵan Qynabek degen bir qazaq bar. Saǵan bir kómektesse sol kómektesedi dep máslıhat aıtady. «Jazǵan qulda sharshaý bar ma», Ǵazekeń aqsaqaldardyń aıtqanyn istep, tosyp otyrǵandaı Qynekeńniń úıine jeti qarańǵyda jetip keledi. Kelse aǵasy úıde joq, jeńgeı ǵana bar eken. Men Qynabek aǵaıǵa Aqtóbeden arnaıy keldim degen soń qarsy alyp, qonaq qylady. Túnniń bir ýaqytynda ǵana úıine kelgen qojaıyn ony oıatpaı, tań atýyn kútedi. Ertesine barlyq mán-jaıdy bilgennen soń qandaı jumysqa turǵysy keletinin suraıdy. Saýda salasynyń esep-qısap jaǵyn qalaımyn, deıdi qonaq. Sol jerde Qynekeń О́zbek KSR Saýda mınıstri Magrýpovqa týra telefon shalyp, kóp ózbektiń ortasynda bir qazaqqa oryn taýy­p berińiz dep ótinedi. Sóıtip, Qyne­keńniń sózin jerge tastamaǵan mınıstr Ǵ.Sársenǵalıevti qalalyq tamaqtaný salasy saýdasynyń bas esepshiligine taǵaıyndaıdy. Sol Sársenǵalıev osy qyzmetti 30 jyldaı taban aýdarmaı istep, «qazaqtyń Rokfelleri» degen at alady. Q.Úkibaevtyń jaqsylyǵyn umytpaǵan ol onymen ómir-boıy dos-jar bolyp ótedi.

Qynekeńniń basynda mundaı oqıǵalar kóp bolǵan. О́zin saǵalap kelgen talaı qazaqqa ol pana bola bilgen. Biraq solardyń kóbi qoıǵan qyzmetti durys atqara almaı, shyǵyp qala beredi eken.

Q.Úkibaev óz ómirinde qazaq pen ózbektiń talaı jaqsy-jam­pozdarymen de jaqsy kóńil­de bolǵan. Solardyń ishinde Hrý­shevtiń qýǵynymen Shymkentke aýystyrylyp, oblystyq atqarý komıteti tóraǵasynyń orynbasary bolǵan Jumabek Táshenovti ol aıryqsha qurmetteıdi. Jumekeńdi О́zbekstanǵa jıi shaqyryp, qatty qurmet kórsetip turady eken. Sondaı-aq, qazaqtyń óner adamdaryn da talaı ret qarsy alyp, alaqanǵa salǵandaı qurmettegen azamattyq isteri áıgili. Baýyrjan Momyshuly, Marfýǵa Aıthojına, Shymbolat Dildebaev jáne t.b. aqyn-jazýshylar Qynekeń tarapynan syı-qurmetke bólengen.

О́mirde «jaqsymen janasyp, jamannan adasyp» júrgen Qy­nekeń О́zbek KSR-niń I  hatshysy bolǵan Ýsman Iýsýpov, Nýrıddın Mýhıtdınov, Sharaf Rashıdovpen máslıhattasyp, aldyna barýmen qatar, dámdes bolǵan. О́z estelikterinde olardyń tarapyna jyly lebizder bildiredi. Al I.Ýsmanhodjaevqa ákesin jaqsy bilgendikten tanys bolsa da Lıgachev sııaqty áperbaqandardy moınyna mingizip qoıdy, Gdlıan-Ivanov degen jaýyzdardyń lańyna tosqaýyl qoıa almady dep kiná taǵady. Sol úshin de oǵan ózbek halqy nálet aıtty deı kelip, ony Jumabek Táshenovpen salystyryp, qazaq halqynyń máńgilik qurmetine bólengen azamattyń isin úlgi qylady. Qynabek aǵamyz Dinmuhamed Qonaevty da jaqsy bilgen, onymen úsh ret saparlas bolyp, kóp pikirlesken eken. Estelik kitabynda olar týraly aıtylǵan. Atalmysh kitabynda Qynekeń Qazaqstan men О́zbekstannyń qazirgi prezıdentteri N.Nazarbaev pen I.Karımovti qalaı kórgenin, qaı jerlerde birge bolǵanyn aıta kelip, olar turǵysynda jyly pikirler bildiredi.

Qynabek Úkibaıuly 1989 jyly kooperatıvtik qozǵalys bas­­talǵanda 76 jasta eken. Biraq osy jasyna qaramaı ol ózi tura­tyn Sardoba aýylynda kooperatıv ashyp, oǵan basshylyq etedi. «Eginniń ebin, saýdanyń te­gin» biletin ol az ýaqytta óz kooperatıvin gúldendirip, aldyń­ǵy qatarly sharýashylyqqa aınaldyrady. Sóıtip, urpaqtaryna paıdanyń kózin kórsetip ketedi.

Q.Úkibaevtyń eńbegin ózbek úkimeti joǵary baǵalady. Ol Eń­bek Eri atanýymen birge Lenın, Oktıabr Revolıýsııasy, Qyzyl Tý, «Qurmet Belgisi», «Qyzyl  Juldyz» sııaqty birqatar ordenmen nagradtalǵan. Qazir ózi 14 jyl basqarǵan sharýashylyqqa sol kisiniń esimin bergen jáne Syr­darııa oblysyndaǵy Aq altyn aýdanynyń ortalyǵyna 1999 jyly eskertkish-bıýstin ornatqan.

Bıyl 100 jasqa tolatyn Q.Úkibaev zaıyby Narkúlmen birge ulaǵatty ul-qyz ósirgen adamdar. Uldyń úlkeni Artyqbaı Úkibaev Tashkent polıtehnıkalyq ınstıtýtyn bitirip, Iаngıer qalasyndaǵy qurylys mekemelerinde túrli bas­shylyq qyzmetter atqarǵan. Keıin Tashkentte qazaq ulttyq mádenı ortalyǵyn uıymdastyrǵan. Osy jerden О́zbekstan Respýb­lıkasy Prezıdentiniń apparatyna jaýapty jumysqa alynyp, biraz jyl eńbek etken. Qazir Shymkent qalasynda turady. Úıli-barandy. Qynekeńniń Artyqbaıdan týǵan bir nemeresi Nurlybek Bı-Bı-Sı teleradıokompanııasynyń Ortalyq Azııa bólimshesiniń jetekshisi. Kishi uly Marat áke jolyn qýyp, keńshar, ujymshar basqarǵan. Onyń da birneshe balasy bar. Qynekeńniń qyzdary da qııaǵa qonyp, adal eńbek etip, urpaq ósirip otyrǵan jandar.

Qynabek Úkibaev maǵynaly da mazmundy ómir súrip, 1994 jy­ly 81 jasynda dúnıeden ótedi. Ony jerleý rásimine arnaıy kel­gen О́zbekstan Respýblıkasy Prezıdentiniń keńesshisi Narzýlla Jýraev bylaı dep eske alady: «Men sol kúndi óte kóp oılaımyn. Sol kúngi azadaǵy adamdardyń jú­zindegi qaıǵy-qasiret áli kúnge kóz aldymnan ketpeıdi. О́z ómirinde máńgilikke qatysty qanshama qyrýar jumystardy atqaryp, bolashaqqa ómir-baqılyq eskertkish bolyp ornaıtyn jasampazdyq sharýasyn tyndyryp ketken adamdar qashanda eldiń qurmetinde qalatynyn sol kezde bir kórdim».

Mine, ózbek jerinde júrip Eńbek Eri atanǵan, halqynyń jaqsy atyn shyǵarǵan ulaǵatty jannyń ulan-asyr isteri men úlgili ómiriniń bir qyry osyndaı.

Jaqsybaı SAMRAT,

«Egemen Qazaqstan».