Atalǵan kórmege qatysýshylar qatarynda Seher Altyner, Asyly Janlyel, Nılgıýn Gektash, Pelın Toleda Seıhan, Elena Djan syndy óner sheberlerin toptastyrǵan. Sheberler qandaıda bir óner týyndysyn jaryqqa shyǵarý barysynda túrli materıal, tas, mármár, qysh, polıter, túıme, kofe dáni, aına, bıser sııaqty materıaldardy paıdalanady. «Mosaic Almaty» tobynyń sońǵy úsh jylda atqarǵan jemisti eńbekteriniń nátıjesinde oryndalǵan birsypyra shyǵarmasy alǵash ret usynylǵan bolatyn. Tanymal óner janry – túrik mozaıkasy bizdiń zamanymyzǵa deıingi ǵasyrlardan bastaý alady.
Kartınalar men ár alýan sándik buıymdar erteden-aq mánerliligi, kóz jaýyn alar kórkemdigimen saraı, hram, shirkeýlerdiń sán-saltanatyn asqaqtatty. Altyn ǵasyr tusynda bul óner Rım, Vızantııa ımperııalary kóleminde keń tanylyp, záýlim ǵımarattardyń eden, tóbe, qabyrǵalaryn bezendirý úshin qoldanyldy. Mysaly, qyzǵaldaqtarmen bezendirilgen áıgili qysh kesindilerinen quralǵan mozaıka alǵash Túrkııada paıda boldy. Baıyrǵy túrik turǵyndary sándik buıymdarynda kóbinese kókónis órnegin qoldanǵan.
Seher Altynerdiń týǵan jeri Ystanbul qalasy, mamandyǵy boıynsha arheolog ári sýretshi. Seher «Fılıpp Morrıs» kompanııasynyń qarjy bóliminde birneshe jyl qyzmet atqardy. Budan keıin shyǵarmashylyqpen, tikeleı mozaıka ónerimen Izmır stýdııasynda mozaıka qurýdyń qyr-syrymen aınalysty.Italııada mozaıkanyń ejelgi vızantııalyq tehnıkasyn zerttep, Ravannada kórkem-óner salasy boıynsha bilim aldy. Ol óz shyǵarmalarynda Van Gog, Mıkelandjelo, Klımt, Vermeer jáne Botıchellı syndy tanymal sýretshilerdiń shyǵarmalaryna júginedi.
Búginde Almatyda qyzmet atqaryp júrgen top jetekshisi Seher men onyń shákirtteri (Túrkııadan) shyǵarmashylyǵyn jetildirýmen qatar, mozaıka ónerine qyzyǵýshylardy tańsyq ónerge mashyqtandyrady.
Saparbaı PARMANQUL, «Egemen Qazaqstan» ALMATY