Jańǵyryq jaıly hıkaıa

Birde kópti kórgen, kókiregi darııa qart atasynan nemeresi «Abzal atashym, jaqsy men ja­mannyń aıyrmasy qandaı?» dep surapty. Jas jetkinshektiń saýalyna tańdanǵan kósheli aq­saqal ony jetektep, aýyl ma­ńyndaǵy jartasty bıik taý­dyń etegine ákelip,  «al balam myna taýmen amandas» deıdi. Bala barynsha daýysyn kóterip «assalaýmaǵaleıkým» dese, álgi jartasty taý da jańǵyryǵyp onyń sálemin sózbe-sóz ózine qaıtalaıdy. Bala máseleniń baıybyna tereńdeı almaı atasyna tańdana qaraıdy. Jyly jymıǵan aqsaqal oǵan «endi sen myna taýǵa «aqymaqsyń» dep aıǵaıla» deıdi. Bala týra solaı isteıdi. Jańǵyryq ta «aqy­maqsyń» dep balanyń sózin qaıtalaıdy.

Sonda qarııa: «Kórdiń be, balam, jaqsylyq pen jamandyqtyń aıyrmasy myna jańǵyryq sııaq­ty jaqsy sóz aıtyp, jaqsy is isteseń ol saǵan jaqsylyq bolyp qaıtady, jaman sóz  aıtyp, jaman is atqarsań ol saǵan jaman­dyq bolyp qaıtady» depti de, sózin ári qaraı jalǵap: 

– Birde Muhammed paıǵam­barǵa din dushpandary kelip «sen jaman adamsyń, anaýsyń, mynaýsyń» dep tildeıdi. Paıǵam­barymyz (s.a.s) olardyń sózin maquldap «ıá, ıá» deı be­ripti. Basqa qarsy eshteńe aıt­­pap­ty. Álgi adamdar ketken soń qasyndaǵy sahabalar: «Ýa, Allanyń Elshisi, siz olar aıtqandaı jaman adam emessiz. Ardaqty jansyz, ádiletti súıesiz, meıirimdilikti ustanasyz» deıdi. Adamzattyń ardaqtysy olarǵa da eshteńe demeı «ıá, ıá» dep otyra beripti. Ań-tań bolǵan sahabalar «siz ózińizdi tildegenderge de «ıá» dedińiz, bizge de «ıá» dedińiz. Bul qalaı bolǵany?» dep suraıdy.  Sonda Allanyń Elshisi: (s.a.s) «Kimniń aýzynan qandaı sóz shyqsa, demek onyń ózi sondaı» degen eken.

Qurmetti nemerem, saǵan aıtarym: bir adam týraly jaman pikir aıtpaı turyp oılan. О́ıtkeni kimde-kim adamdar jaıly jaqsy sóılese, ol adamnyń ózi de jaqsy. Al kimde-kim adamdardy únemi jamandap otyrsa, bilip qoı, onyń ózi sondaı pende bolǵany. Osy sózimdi máńgi esińe saqtaǵaısyń!