36 balýan Nur-Sultanda baq synaıdy

Keshe Ortalyq kommýnıkasııalar qyz­metinde Qazaq kúresi federasııasynyń pre­­zıdenti Ar­man Shoraev, Má­denıet jáne sport mı­nıstr­­ligi­niń Sport jáne de­ne shynyqtyrý isteri komı­­tetiniń tóraǵasy Serik Sá­pıev, «ORDA INVEST» korporasııasynyń Bas­qarma tóraǵasy Shalqarbek Talıpov jáne Ult­tyq Olımpıada komı­tetiniń Sport dırek­sııa­­synyń dırektory Elsııar Qana­ǵatov qa­tys­qan baspasóz jıy­ny ótti. 

Arman Shoraevtyń aıtýynsha, osymen toǵyzynshy ret ótetin básekege elimizdiń 14 oblysynan, Nur-Sul­tan, Almaty, Shymkent qa­la­la­rynan jáne kúshtik qu­rylymdar arasyndaǵy týrnırde irikteýden ótken 36 úzdik balýan qatysady. «Qa­zaqstan barysy» týr­­nıri 8 maýsymda 13:00-de balýandardyń jere­be tartý rásiminen bastalmaq. Tar­tys­ty beldesýler jeti saǵatqa sozylady dep jospar­lanǵan. 

«Bıylǵy týrnırdiń júl­de qoryna 41 mln teńge bó­linip otyr. «Qazaqstan bary­sy» atanǵan balýanǵa altyn belbeý men altynnan quıylǵan aýyspaly «Taıtuıaq» jáne 25 mln teńge qar­jylaı syıaqy beriledi. Ekinshi jáne úshinshi oryn ıegerleri sáıkesinshe kúmis jáne qola belbeýlermen ma­rapattalady. Sonymen qa­tar ár beldesýdegi jeńiske jet­ken balýanǵa 100 myń teń­geden beriledi. Jalpy júl­de qomaqty bolǵany jaqsy, biraq «Qazaqstan barysy» ataǵy odan da joǵary turady dep oılaımyn. Bul ataqty alý búgingi tańda ár balýannyń armany», deıdi ol.

Bıylǵy týrnır jyldaǵy ereje boıynsha iriktelip, sol dástúr boıynsha ótedi. Al kelesi jyldan bastap ár ob­lystan tek bir ǵana balýan qatysatyn bolady. Ony upaı, reıtıng arqyly anyqtamaq. «Keı oblystarda qazaq kúresi jaqsy damyǵan. Keıbir ob­lystardyń deńgeıi onsha emes. Bıyl Qostanaı oblysyn­da «Qazaqstan barysyna» ba­lýandardy irik­teý tómen deń­geıde uıymdastyrylǵan. Al Qy­­zyl­orda, Túrkistan, Al­maty, Shyǵys Qa­zaq­­stan oblystarynda «sen tur, men ataıyn»­ degen balýandar kóp. Reıtıng boıynsha olar­ǵa jarysqa qatysýǵa múm­kindik beremiz dep oılaımyn. Reıtıngte joǵary upaı jınaý úshin kúntizbemizdegi saıystarǵa qatysý kerek», dep sózin túıin­dedi Arman Shoraev.

Ulttyq Olımpıada komıtetiniń Sport dıreksııasynyń dırektory Elsııar Qanaǵatov Qazaq kúresine erekshe kóńil bólip, «Qazaqstan barysy» jobasyn da qoldaıtyndaryn jet­kizdi. Munyń dáleli retinde jýyrda ǵana Ult­tyq Olımpıada komıtetiniń tóraǵasy Tımýr Qulybaev Lozannada Halyqaralyq kúres fede­rasııasynyń basshysymen kezdesip, Halyq­aralyq qazaq kúresi federasııasyn múshelikke engizý máselesin qozǵap, sol jaqtan qoldaý tapqanyn atap ótti. 

«Qazaqstan barysy» týrnıri «Nur-Otan»­ partııasy, «Samuryq-Qazyna» Ult­­­tyq ál-aýqat qory, Mádenıet jáne sport mınıstrligi, Nur-Sultan qalasy ákimdiginiń qoldaýymen Qazaq kúresi federasııasy jáne «Qazaqstan barysy» qazaq kúresin damytý qory uıymdastyrýda.