Orta salmaqtaǵy qazaqstandyq kásipqoı boksshy, álemniń eks-chempıony Gennadıı Golovkın men kanadalyq Stıv Rolls 9 maýsymda ótetin jekpe-jek aldynda jankúıerlerge arnap ashyq jattyǵý ótkizdi.
AQSh-tyń Nıý-Iork qalasyndaǵy Taıms-Skver alańynda ótken ashyq jattyǵýǵa Golovkınnen bólek, boks keshiniń anderkardynda judyryqtasatyn otandasymyz Álı Ahmedov jáne taǵy bir jerlesimiz Baqtııar Eıýbovtyń qarsylasy Braıan Sebalo qatysty. Ashyq jattyǵýdan keıin boksshylar jankúıerlermen birge fotosessııa jasap, qoltańba qoıylǵan estelik buıymdardy da syıǵa tartty. Sondaı-aq Golovkın AQSh-taǵy qazaqstandyq jankúıerge tegin bılet syılady.
Aıta keteıik, Gennadıı Golovkın men Stıv Rolls arasyndaǵy aıqas 9 maýsymda AQSh-tyń Nıý-Iork qalasyndaǵy Madison Square Garden arenasynda ótedi. Kezdesý 12 raýndqa josparlanǵan.