OSLO, 18 maýsym 2019 jyl – Osloda «Qazaqstan: jańa ekonomıkalyq múmkindikter» taqyryby boıynsha bıznes semınar ótti. Qazaqstannyń Norvegııadaǵy Elshiligi uıymdastyrǵan issharaǵa norvegııalyq bıznes pen salalyq ınstıtýttardyń transport pen logıstıka, aýyl sharýashylyǵy, saýda, telekommýnıkasııalar, energetıka, qurylys, tamaq ónerkásibi jáne basqa salalardyń otyzdan astam ókilderi qatysty.
Negizgi baıandama jasaǵan Qazaqstannyń Syrtqy ister mınıstriniń orynbasary Roman Vasılenko Qazaqstandaǵy prezıdenttik saılaýdyń qorytyndylary jáne Prezıdent Qasym-Jomart Toqaevtyń ulyqtaý rásiminde aıqyndaǵan on basymdyǵy týraly aqparattandyrdy.
«Memleket basshysynyń qaǵıdalary – «Sabaqtastyq. Ádildik. О́rleý». Prezıdent Qazaqstannyń álemge, jańa jetistikterge jáne tehnologııalarǵa ashyq ekeniń anyq kórsetti. Bizdiń elimiz isker adamdardy budan bylaı da qoldap, ınvestısııalardy tartý men qorǵaý, iskerlik belsendilikti yntalandyrý, orta tapty nyǵaıtý saıasatyn júrgizetin bolady», - dedi Mınıstrdiń orynbasary.
Qazaqstan men Norvegııa arasyndaǵy saýda aınalymy 2018 jyly 60 mln. dollaryn qurady. R. Vasılenkonyń aıtýynsha, bul saýda-ekonomıkalyq yntymaqtastyqtyń zor áleýetin aıǵaqtaıdy. Bıznes semınar kezinde ózara is-qımyldyń úsh negizgi baǵyty aıqyndaldy. Olar transport pen logıstıka, aýyl sharýashylyǵy (Qazaqstannan bıdaı, Norvegııadan balyq pen teńiz ónimderin tasymaldaý, akvamádenıetti birlesip damytý) jáne qarjy qyzmetteri.
R. Vasılenko Norvegııa bıznesi úshin «Astana» Halyqaralyq qarjy ortalyǵynyń múmkindikterin tanystyryp, «AstanaHub» Halyqaralyq IT startaptar ortalyǵy jáne Halyqaralyq jasyl tehnologııalar men ınvestısııalyq jobalar ortalyǵynyń norvegııalyq damý ınstıtýttarymen yntymaqtasý áleýeti týraly aıtyp berdi.
Bıznes semınar kezinde Qazaqstandaǵy sheteldik ınvestorlar úshin jasalǵan múmkindikter týraly «Kazakh Invest» Ulttyq kompanııasynyń óńirlik ókili Jandos Nurlanov baıandap berdi.