Qazaqstan Respýblıkasynyń saılanǵan Prezıdenti qyzmetine resmı kirisý rásiminiń tarıhı bir sáti, ant qabyldaýdan keıin sóz sóılegen Qasym-Jomart Toqaev óz sózin «Asa qadirli Elbasy» dep bastaýy jáne de «aqıqatyn aıtýymyz kerek, bul saılaýda bizdiń azamattarymyz Elbasynyń strategııalyq baǵytyn qoldap daýys berdi. Nursultan Ábishuly Nazarbaev búkil álem moıyndaǵan damý modelin jasady. Qazaqstannyń Kók týyn dúnıe júziniń túkpir-túkpirinde jelbiretti», deı baǵa bere sóıleýi kóńil tolqytqany da anyq.
Qazaq tarıhynda bir Prezıdent aýysyp, bir Prezıdenttiń bılikke kelýiniń mundaı saltanaty tuńǵysh ret bolyp otyr. Jáne de óziniń bıligin óz erkimen bergen Tuńǵysh Prezıdent Nazarbaev pen jańadan saılanǵan Prezıdent Toqaev arasyndaǵy qarapaıym adamı parasattylyq baılanysynyń adal nıetpen ornyqqanyna da kóz jetip, kóńil ılanǵandaı. О́z basym soǵan qýandym.
Myna almaǵaıyp zaman jáne de sol zamannyń sońǵy shırek ǵasyrdaǵy jańa dúnıe bólisi men sol dúnıege óz yqpaldary, tipti óz óktemdikterin júrgizý úshin jantalasyp, tipti aptyqqan da aryndaǵan, qarýlanyp ta qursaýlanyp ta alǵan álemdik saıasattyń soıyly soǵyla bastaǵan kezeńder boldy, ol áli de bar.
Al biraq qazirgi ýaqytta bizdiń elimizben álemniń kez kelgen memleketi sanasady deıtin bolsaq, bizdiń elimiz de, halqymyz da sanasýǵa turarlyq ekendigine álemniń kózin jetkizgen de Tuńǵysh Prezıdentimiz bolatyn. Osy oraıda Qazaqstan Respýblıkasynyń jańa saılanǵan Prezıdenti Qasym-Jomart Toqaevtyń qyzmetine resmı kirisý rásiminde: «Elbasy – qazaq memleketiniń negizin qalaýshy uly tulǵa. Ol jahandyq deńgeıdegi memleket qaıratkeri. Álem tarıhyna dál osylaı jazyldy. Elbasynyń halqymyz úshin jáne álemdik qoǵamdastyq úshin sińirgen orasan zor eńbegin árqashan qurmetteý – bárimizge ortaq paryz», dep málimdeýi de ábden oryndy edi. Áýelden hanynyń sońynan topyraq shashpaǵan el ekenimizdi taǵy da bir tanytqan tarıh taǵyndaǵy Toqaevtyń osy bir aýyz sózi – barshamyz úshin toqtarlyq sóz.
Qazaqstan Prezıdenti Qasym-Jomart Toqaevtyń Elbasy Nursultan Nazarbaevqa asa joǵary baǵa berýi jáne de zor qurmet kórsetýi men onyń jolyn jalǵastyratyndyǵy jónindegi málimdemesi táýelsizdik taǵdyrynyń búgini men bolashaǵyn senimdi etip, aıqyndaı túskendigin aıtqan abzal. Dúnıeni revolıýsııalyq jolmen emes, evolıýsııalyq jolmen damytýdyń adamzat taǵdyry úshin qanshalyqty mańyzdy ekendigin Elbasy san márte aıtqan da bolatyn. Qazir tek qana ilgeri qaraıtyn, ilgeri basatyn zaman. Sony tereń sezine bilgen Qasym-Jomart Kemelulynyń sabaqtastyqty Qazaq elin damytýdyń, el táýelsizdigin odan ári nyǵaıtýdyń salıqaly saıasaty etip alǵa tartqany da kóńilge qonymdy ári ony oryndy da ornyqty ustanym dep tanımyz.
Biz – demokratııalyq jáne quqyqtyq memleket qurýdy áý bastan qolǵa alǵan elmiz. Alaıda sol demokratııa degenimiz qazaqqa jat ta dúnıe emes edi. Bizdiń halqymyzdyń qanyna sińip, boıyna bitken bir qasıeti – sózge toqtaı bilgendigin óz basym demokratııanyń kókesi dep te aıtqan bolar edim. Alaıda osy kúnderi sol sózge toqtaý qasıetinen aıyrylyp bara jatqanymyz úshin de alańdaıtyn jaı bar. Árkimniń ózine ózi «men demokratııalyq qoǵamda ómir súrýge ázirmin be?» degen saýal qoıa bilgeni jón. Demokratııalyq qoǵamda ómir súrýdiń basty sharty áýeli sol óziń ómir súrip otyrǵan memlekettiń zańyn syılaý men saqtaýdan bastalaryn da uǵynar kez keldi.
Biz óz táýelsizdigimizdiń shırek ǵasyrdan endi asa bastaǵan kezeńderinde tolyqqandy demokratııalyq qoǵamǵa qol jetkize almaǵanymyz da anyq bolar, bálkim. Ár qadamyn ólshep basar, ár sózin ańdap sóıler kezeńde turmyz. Áli de jańa álemde jańasha ómir súrýdi úırenip te, ıgerip te jatyrmyz dep baǵamdaǵanymyz abzal. Osy oraıda Qasym-Jomart Toqaevtyń «árbir azamattyń pikiri – biz úshin óte mańyzdy. О́ıtkeni halqymyzdyń tatýlyǵy, yntymaǵy, birligi – bizdiń eń basty qundylyǵymyz. Osy qundylyqty kózdiń qarashyǵyndaı saqtaý – barshamyzǵa ortaq paryz», dep aıtqan bir aýyz sózindegi «tatýlyq», «yntymaq», «birlik» sııaqty úsh qundylyq bizdiń búgingi demokratııashyl kóńilimizdiń túkpirinde jatýy kerek. Osy úsh qundylyqty saqtaı bilý árqaısymyzdyń táýelsizdik aldyndaǵy basty boryshymyz bolsa kerek.
Qazaqstan Respýblıkasynyń saılanǵan Prezıdenti qyzmetine resmı kirisý rásiminde Qasym-Jomart Toqaevtyń: «Elimizdiń ár azamatynyń múddesin qorǵaý – meniń basty maqsatym. Olardy saıası kózqarastary men ustanymdaryna qaraı bólýge jol bermeımin. Túrli saıası jáne qoǵam qaıratkerlerinen kelip túsken qundy usynystardy, bastamalardy men óz jumysymda mindetti túrde eskeremin. Ashyq jáne ádil jumys isteımiz. Biz úshin eń mańyzdy mindet – zańǵa saı adal qyzmet etý», dep atap kórsetkenin memleketimizdiń odan ári jetile túsýiniń kepili dep uǵynar edik.
Jáne de Qasym-Jomart Kemelulynyń birinshi kezekte Qazaqstannyń úshinshi jańǵyrtylýyn, qazirgi ótkir áleýmettik problemalardy sheshýmen naqty aınalysý men asa muqtajdarǵa kómek kórsetý, qoǵamnyń birligin qamtamasyz etip, ár azamattyń quqyǵyn qorǵaý, qashanda jáne qaı jerde de Qazaqstannyń ulttyq múddesin qorǵaý sııaqty ózekti máselelerdi alǵa tartýynyń da úlken strategııalyq mańyzy bar ustanymdar ekendigin aıtar edik. Bul oraıda naqtyly on mindettiń belgilenýi de, solardyń keıbiriniń qazirden júzege asyryla bastaýy da jańa Prezıdentimizdiń tolyqqandy memleketshil tulǵa ekendigin aıǵaqtap, senimdi nyǵaıta túsedi.
Tarıh taǵyndaǵy táýelsizdiktiń jańa taǵdyryn aıqyn anyqtap alǵan jańa Prezıdentimiz Qasym-Jomart Toqaev eń áýeli bıliktiń halyq aldyndaǵy jaýapkershiligin arttyrý qajettigin alǵa tartty. Halyqtyń tabysyn arttyrý, sybaılas jemqorlyqty joıý, sot jáne quqyq qorǵaý júıesin reformalaý, jańa jumys oryndaryn ashý jáne halyqty laıyqty jalaqymen qamtý, turǵyn úı máselesine basymdyq berý sııaqty búgingi kúni qalyń buqarany tolǵandyryp otyrǵan ózekti máselelerge qatysty da tyń oılar aıtylyp, olarǵa baılanysty naqty ister qolǵa alynatyny atap kórsetildi.
О́z halqyna adal qyzmet etýge ant bergen Qasym-Jomart Toqaev ádiletti áleýmettik ustanymymen jáne óńirlerdi damytýdyń jańa baǵytymen, «Rýhanı jańǵyrý» qundylyqtarymyzdyń rýhanı baǵdarymyzben, qalyptasqan ustamdy syrtqy saıasatpen, jas urpaqqa degen senimmen jedel ózgerister dáýirine kúni-túni bir qalǵymaı shapshańdata qadam basyp kele jatqan búgingi álemge óz elimen, óz halqymen birge qadam basty. Jańa Prezıdentimiz endi buǵan deıin tolmaı qalǵan tusymyzdy tolyqtyryp, bolmaı qalǵan keı isimizdi boldyryp, óz halqymen birge Qazaq eli táýelsizdiginiń juldyzyn jarqyrata túsedi dep senemiz. Tek Jaratqan Iemiz jar bolsyn!
Jabal ERǴALIEV,
jazýshy-dramatýrg, Qazaqstannyń eńbek sińirgen qaıratkeri
KО́KShETAÝ