«Petropavl qalasynda turatyn Soltústik Qazaqstan oblysynyń qurmetti azamattary Jaqsylyq Ysqaqov pen Bolat Saǵyndyqov, sondaı-aq Zeınolla Oljabaev, Tańat Súgirbaev, Amangeldi Kenjeǵozınov, Ahmetjan Qýantaev, Jangeldi Tájın jáne Saǵyndyq Salmurzın syndy belsendi aǵalarymyz elimizdegi Prezıdent saılaýy qarsańynda «Nur Otan» partııasynan usynylǵan kandıdat Qasym-Jomart Toqaevtyń oblystyq qoǵamdyq qabyldaý bólmesi arqyly Parlament Májilisiniń depýtaty retinde maǵan hat joldap, astanamyz Nur-Sultan qalasynda kórnekti memleket jáne qoǵam qaıratkeri Jumabek Táshenevke eskertkish ornatýǵa kómektesýimdi suraǵan edi.
Men osy jóninde Nur-Sultan qalasynyń burynǵy ákimi Baqyt Sultanovqa hat jazyp, halqymyz aıryqsha ardaq tutatyn tarıhı tulǵanyń dúnıege kelgenine kelesi jyly 105 jyl tolatyndyǵyn eskere otyryp, oǵan astanada laıyqty eskertkish ornatý máselesin qaraýyn ótingen bolatynmyn.
Búgin astana ákiminiń orynbasary Erlan Kanalımov qol qoıǵan resmı jaýapty alyp, qýanyp otyrmyn. Qala ákimdigi Jumabek Táshenevke eskertkish ornatý úshin jer telimi jáne qarjy kózi qarastyrylyp jatqandyǵyn habarlapty»-dep jazdy Káribaı Musyrman. Onyń sózine qaraǵanda qaıratkerge arnalǵan eskertkish Nur-Sultan qalasyndaǵy Jumabek Táshenev kóshesiniń boıynda ornatylady eken.
Al qazaq jeriniń bólshektenýine jol bermegen saıasatkerge birneshe jyl buryn Petropavl qalasynda eskertkish ornatylǵan bolatyn.