Alqaly basqosýǵa tóraǵalyq etken aımaq basshysy Qumar Aqsaqalov bıyl Tuńǵysh Prezıdentimiz N. Nazarbaevtyń memleket basqarǵanyna 30 jyl tolǵanyn, osy jyldar aralyǵynda jas elimiz álemge tanylyp, bir shańyraq astynda dostyǵy jarasqan qazaq halqy men san alýan etnos ókilderi ortaq maqsat jolynda jumyla eńbek etip kele jatqanyn atap kórsetti.
«Elbasynyń tikeleı bastamasymen qurylǵan Qazaqstan halqy Assambleıasy tatýlyqtyń temirqazyǵy ispettes biregeı qoǵamdyq ınstıtýtqa aınalyp, jarqyn bastamalar men ıgi isterge uıytqy bolyp júr. Túrkistan oblysy Arys qalasynyń turǵyndary bastan ótkergen qaıǵyly oqıǵaǵa etnomádenı birlestikter alǵashqylardyń qatarynda ún qatyp, kómek kórsetýi–sonyń bir dáleli», dedi Qumar Irgebaıuly.
Memleket Basshysy Qasym-Jomart Toqaev usynǵan on baǵyt boıynsha jergilikti jerlerde atqarylýy tıis mindetterge toqtaldy. Júzege asyrylyp jatqan aýqymdy ınvestısııalyq jobalar aıasynda jyl sońyn deıin 30 myńnan astam adam jumyspen qamtamasyz etiledi. Qabyldanǵan is-sharalardyń biri shaǵyn jáne orta bıznesti damytýǵa baǵyttalǵan. «Eńbek» baǵdarlamasy sheńberinde qazynadan úsh mıllıard teńge bólinip, oǵan eki júz turǵyn tartylǵan. Kópbalaly analar, az qamtylǵan otbasylar, múmkindigi shekteýli jandar úshin de erekshe basymdyq berilip otyr. 3690 otbasyǵa ataýly áleýmettik járdem kórsetilse, 520-i–kópbalaly sanatyndaǵylar. О́z kásibin ashqysy keletinderge granttar beriledi.
Aýyr ónerkásip salasyndaǵy tehnologııalyq jańǵyrtý jumystary keshendi túrde júrgizilýde. Petropavl jáne S.Kırov atyndaǵy zaýyttar ónimderine suranys mol. «Syrymbet» ken orny qalaıyny óńdep, eksportqa jóneltýmen aınalysatyn bolady. Qazir munda taý-ken ónerkásibin órkendetý maqsatymen qomaqty ınvestısııa quıylǵan. Sýmen jabdyqtaý nysandaryn qalpyna keltirýge 9,1 mıllıard teńge qarastyrylǵan. Jeti júz shaqyrym jol jóndelip, 235 myń sharshy metr turǵyn úı iske qosylady.
О́ńir aýmaǵynda jumys isteıtin eki júzden astam etnomádenı uıymdardyń rýhanı kelisimdi nyǵaıtýǵa qosyp otyrǵan úlesi aıryqsha. Analar keńesi, medıasııa kabıneti, qaıyrymdylyq klýby qoǵamdyq-saıası, mádenı sharalardan shet qalǵan emes. «Jastar jyly» boıynsha eriktiler qozǵalysyn damytýǵa, forýmdar, aksııalar, konferensııalar ótkizýge basa nazar aýdarylady.
Jıynda Aqtóbe qalasynda otan aldyndaǵy azamattyq boryshyn óteý kezinde lańkesterge qarsy janqııarlyq erlik kórsetkeni úshin «Aıbyn» ordenimen marapattalǵan Bahtııar Qaıyrbekov, evreı mádenı ortalyǵy tóraǵasynyń orynbasary Elhan Evdaev sóz alyp, keń-baıtaq elimizdiń ósip-órkendeýine jas býyn óz úlesterin qosatynyn, aǵa urpaq ókilderi senip tapsyrǵan estafetaǵa kir keltirmeıtinderin jetkizdi.
Vytautas Magnus ýnıversıtetiniń doktoranty Nazım Nıkıforovtyń Qazaqstan azamaty retinde men qaı kezde de memlekettiń úzdiksiz qoldaýyn sezinip kelemin. Eýropanyń tanymal oqý oryndarynyń birinde oqyp, bilim aldym. Alǵa qoıǵan josparlarym kóp, degen júrekjardy sózderin jınalǵandar úlken yqylaspen qabyldady.
Otyrysta Qazaqstan halqy oblystyq assambleıasy tóraǵasynyń orynbasary bolyp «Vaınah» sheshen-ıngýsh qoǵamdyq-mádenı birlestiginiń jetekshisi Saıp Baıdýev saılandy.
Soltústik Qazaqstan oblysy