Oblys ákiminiń orynbasary Rýslan Rústemov aımaqtyń sý sharýashylyǵy qyzmetkerlerin kásibı merekelerimen quttyqtady.
«Elbasy, QR Tuńǵysh Prezıdenti Nursultan Ábishuly Nazarbaevtyń der kezinde qabyldaǵan sheshiminiń arqasynda, Kishi Aral teńizin saqtap qaldyq. Búginde kún kórisi aýyl sharýashylyǵy óndirisine, ıaǵnı sýarmaly sýǵa tikeleı baılanysty aýyldaǵy aǵaıynnyń arman-tilegin oryndaý maqsatynda sý tapshylyǵynyń aldyn alý úshin oblysta birqatar jumystar júrgizilýde. Budan bólek, oblysta 3 mlrd tekshe metr tasqyn sý jınaıtyn 6 sý qoımasyn salý josparlanyp otyr. Sońǵy 4 jylda aýyz sý ınfraqurylymyn damytýǵa 12 mlrd teńgege jýyq qarjy bólinip, 60 sý uńǵymasy iske qosyldy. Oblys ortalyǵy – Qyzylorda qalasy 2015 jyldan bastap tolyǵymen jerasty sý qoryn paıdalanýǵa kóshti», dedi oblys basshysynyń orynbasary.
Aǵymdaǵy jyldyń mamyr aıynda qabyldanǵan Qyzylorda oblysynyń 2019-2022 jyldarǵa arnalǵan áleýmettik-ekonomıkalyq damýynyń Keshendi josparynda ekologııa jáne tabıǵatty paıdalaný salasy, onyń ishinde sý sharýashylyǵyn damytý boıynsha birqatar jobalardy iske asyrý qarastyrylǵan. Atap aıtqanda, Kókaral bógetin saqtaý jáne Syrdarııa ózeniniń arnasyn qalpyna keltirý jónindegi is-sharalar.
Sondaı-aq Qyzylorda sý torabyn keshendi jóndeý kózdelgen, nátıjesinde onyń apattylyq máselesi sheshiletin bolady.
Budan basqa, Keshendi jospar aıasynda «Kúmisketken» jáne «Qaraózek» sý qoımalary salynady, bul sýarmaly jerlerdiń melıoratıvtik jaǵdaıyn jaqsartýǵa jáne sýarmaly sý qorynyń 20 paıyzyn únemdeýge múmkindik beredi.