Aımaq basshysy Qumar Aqsaqalov alty shaǵynaýdan qurylysy men abattandyrý máselesin jete eskerý, shahar aýmaǵyn beı-bereketsiz keńeıte bergennen góri jınaqy qylý qajettigin atap kórsetti.
Sońǵy jyldary oblys ortalyǵynda qurylys jumystary qarqyndy júrgizilip keledi. Alǵashqy jartyjyldyqqa bekitilgen mindet asyra oryndaldy. Bul rette bas jospar jan-jaqty oılastyrylyp, zaman talabyna jaýap berýi kerek ekendigine Almatyda ornalasqan «Gradkompleks» seriktestiginiń dırektory Nurbek Aýjanov ta toqtaldy.
«Teriskeı tórindegi qalanyń áleýeti zor. Infraqurylymyn tyńǵylyqty zerttedik. Bos oryndar shahardyń syrtynda ǵana emes, ishinde de az emes. Beıbereket, paıdasyz turǵan aýmaqtardy tıimdi paıdalana bilgen jón. Meniń oıymsha, nysandar bir-birine jaqyn ornalasýy qajet. 600-den astam jer úı súrilipti. Bıyl bul baǵytta aýqymdy sharýalar atqarylmaq eken. Ekinshiden, ındýstrıaldyq aımaqty qaıta qurý kerektigin aıtqym keledi. Iаǵnı, bos turǵan kásiporyndardyń ǵımarattaryn sport zal, oıyn-saýyq ortalyqtaryna aınaldyrýǵa bolady. Sonda turǵyndardyń suranysy qamtamasyz etiledi», dedi ol.
Petropavl dál Esil jaǵasynda ornyqqanymen, birde-bir kásipker parkke ulasatyn jaǵalaýdy qolǵa almapty. Qumar Irgebaıulynyń aıtýynsha, qalanyń aýmaǵyn ulǵaıtý qomaqty qarjyny, zor shyǵyndy qajet etedi. Sondyqtan jer úılerdi súrip, bosaǵan jerlerdi paıdalaný áldeqaıda tıimdi.
«Sáýlettik stıldi ustanyńyzdar. Nysandardy keshen retinde turǵyzý qajet. Bólek-bólek salyp, ártúrli bolǵany shahar shyraıyn ashpaıdy. Birinshi kezekte tústeri men dızaındaryna mán berińizder. Barlyǵy úndestikte bolsyn. Aıta ketken jón, kommersııalyq maqsatta ǵımarat, baspana salamyn degen ınvestorlardy qoldaýǵa daıynbyz», degen ákim Bereke yqshamaýdanynda kópqabatty baspanalar turǵyzylǵanymen, áli de azdyq etetinin atap kórsetti. Qazir munda 100 páterlik 6 kópqabatty turǵyn úıdiń jobalyq-smetalyq qujattamasy daıyndalyp, 600 oryndy mektep salynýda.
40 gektar aýmaqqa sozylatyn Kopaı zamanaýı shaǵyn aýdanynyń jobasy jınalǵandardyń nazaryna usynyldy. Oǵan birqatar túzetýler engizildi. Shyǵys yqshamaýdanynda kópbeıindi aýrýhana turǵyzylady. Osy mańaıda medısına qyzmetkerlerine arnap kópqabatty baspana boı kóteredi.
Soltústik Qazaqstan oblysy