Qala ákimi Altaı Kólginov «Prıchal» demalys aımaǵynda sýǵa batyp bara jatqan qyzdardy qutqarǵan polısııa qyzmetkeri Rýslan Saıdov pen qutqarýshy Dmıtrıı Inkındi marapattady. Bul týraly qala ákimdiginiń resmı saıty habarlady.
«Bizdiń polısııa qyzmetkerleri men qutqarýshylar óz mindetterin abyroımen atqardy. Sizderdiń jumystaryńyzda qıyndyqtar men synaqtar kóp. О́mirde ártúrli qıyn jaǵdaılar bolyp turady, sol kezde Sizder bizge kómekke kelesizder. Qarapaıym sózben aıtqanda, qutqarýshylar men polıseıler eldiń tynysh uıqysy úshin bárin jasaıdy. 28 shildede shamamen saǵat 15.00-de qutqarýshy Dmıtrıı Inkın «Prıchal» qonaq úıinin aýmaǵynda sýǵa batyp bara jatqan eki qyzdy kórip, olardyń artynan sýǵa sekirdi. Oǵan jaǵalaýdy kúzetip júrgen polısııanyń aǵa ınspektory Rýslan Saıdov kómektesip, oqıǵanyń kýási boldy. Sizder birge qyzdardy shyǵardyńyzdar, aýrýhanaǵa deıin alǵashqy medısınalyq kómek kórsetip, jedel járdem dárigerlerine tapsyrdyńyzdar. Eki adamnyń ómirin saqtap qaldyńyzdar»,- dedi qala ákimi Altaı Kólginov.
Qala basshysy Altaı Kólginov Dmıtrıı Inkın men Rýslan Saıdovqa erligi men batyldyǵy úshin alǵys aıtty.
«Birneshe sekýnd ishinde sheshim qabyldadyńyzdar. Sýdan qutqarý polıseıdiń tikeleı mindeti emes. Biraq Sizder kerek ýaqytta kerek jerde boldyńyzdar. Jasaǵan erlikterińiz basqalarǵa úlgi bolady. El qorǵany degen ataqqa abyroıly qyzmet ete berińizder! Eńbekterińizge jemis, isterińizge sáttilik tileımin»,- dedi A. Kólginov.
Osy jyldyń ózinde elordalyq qutqarýshylar sýdan 18 adamdy qutqardy.