Jańa testileý zalyn ashýdaǵy basty maqsat memlekettik jáne quqyq qorǵaý qyzmetinen óz ornyn tapqysy keletinderge yńǵaıly jaǵdaı jasaý bolyp tabylady. Testileý zalyniń materıaldyq-tehnıkalyq bazasy úzdik quraldar men jabdyqtardan turady. Bul – Qostanaı oblysyndaǵy ekinshi testileý zaly, birinshisi oblys ortalyǵynda ornalasqan.
«Arqalyq qalasynda memlekettik qyzmetshilerdiń testileý zalynyń ashylýy kezdeısoq emes. Osyndaı mańyzdy qadamǵa barar aldynda departament mamandary óńirlerdiń oblys ortalyǵynan alshaqtyǵyn, sondaı-aq memlekettik qyzmetshiler men óńirlerdegi bos oryndar sanyn zerdeledi. Qoljetimdilik, kandıdattar úshin qolaıly jaǵdaı jasaý jáne kóliktik shyǵyndardy azaıtý – zaldy ashýdaǵy basty mindetimiz boldy», deıdi memlekettik qyzmet isteri departamentiniń basshysy Salaýat Múksimov.
Endi Amangeldi, Jangeldi, Naýrzym aýdandarynyń, sondaı-aq Arqalyq qalasynyń óz ómirin memlekettik qyzmetpen baılanystyrǵysy keletin turǵyndaryna barynsha yńǵaıly bolady. Bul óńirlerdiń turǵyndaryna memlekettik qyzmetke testileý tapsyrý úshin Qostanaıǵa at sabyltýdyń qajeti joq. Olar óziniń turǵylyqty jerine jaqyn Arqalyq qalasyna baryp, testterdi tapsyra alady. Bul endi memlekettik qyzmetke úmitkerler óz ýaqyty men qarajatyn únemdeıdi degen sóz.
Sonymen qatar bul testileý zaly Aqmola oblysynyń kórshi Jaqsy, Esil, Jarqaıyń aýdandarynyń, sondaı-aq Qaraǵandy oblysynyń Ulytaý aýdanynyń turǵyndary úshin de yńǵaıly bolady.
Qostanaı