Almatynyń Jetisý aýdanyndaǵy úsh bazarda dárigerler 3 kún boıy qyzmetkerler men kelýshilerdi keshendi aldyn alý sharalarynan ótkizdi. Bul týraly ákimdiktiń baspasóz qyzmeti habarlady.
Almaty ákiminiń tapsyrmasy boıynsha 1-3 tamyz aralyǵynda «Baısat», «Sálem» jáne «Alataý-1» bazarlarynda 2016-2019 jyldarǵa arnalǵan «Densaýlyq» Memlekettik baǵdarlamasyn júzege asyrý aıasynda mundaǵy qyzmetkerler men kelýshiler keshendi medısınalyq aldyn alý sharalarynan ótti.
Medısınalyq profılaktıkalyq qabyldaýlarǵa Jetisý aýdanyndaǵy meduıymdar №11, №21 emhanalar, «Qulager» alǵashqy medısınalyq-sanıtarlyq kómek kórsetý ortalyǵy, №5 emhana, Almaty qalalyq FZOJ ortalyǵynyń, SPID-tiń aldyn alý jáne oǵan qarsy kúres ortalyǵynyń, Teri-venerologııa ortalyǵynyń, Almaty onkologııa ortalyǵynyń mamandary qatysty.
«Turatyn jerlerine qaramastan biz kelýshilerdiń barlyǵyn qabyldadyq. Bazarlarda jumys jasaıtyn kórshi memleketter azamattary da dárigerlerden keńes alyp, medısınalyq baqylaýdan ótti. Tipti keıbireýleri ózderiniń qan qysymyn bilmegen, baıqaý barysynda 21 adamnyń gıpertonııaǵa ushyraǵany anyqtaldy. Olardyń toǵyzyn dárigerler jedel qarap, qan qysymdaryn retke keltirdi. Stasıonarly sıfrly post jumys istedi, sol arqyly adamdar qaı emhanaǵa tirkelgenderin bildi», dedi qalalyq №111 emhananyń terapevt bóliminiń meńgerýshisi Nazym Kúshikbaeva.
1 - 3 tamyz aralyǵynda Baısat», «Sálem» jáne «Alataý-1» bazarlarynyń 425 qyzmetkerleri medbaıqaýdan ótti jáne mamandardan keńes aldy.
«Shetsiz qala» aksııasy aıasynda medıkter 5 tamyzda «Kókmaısa» yqsham aýdany turǵyndaryn keshendi medısınalyq baqylaýdan ótkizdi.