10 tamyzǵa deıin jyl saıynǵy «Daryn» memlekettik jastar syılyǵyna ótinim qabyldanady. Bul týraly Aqparat jáne qoǵamdyq damý mınıstrliginiń baspasóz qyzmeti habarlady.
Baıqaý ádebıet, ǵylym, dızaın jáne beıneleý óneri, jýrnalıstıka, klassıkalyq mýzyka, qoǵamdyq qyzmet, sport, teatr jáne kıno, estrada, halyq shyǵarmashylyǵy nomınasııalary boıynsha ótedi.
Barlyq jeńimpazdarǵa «Daryn» memlekettik jastar syılyǵynyń laýreaty» ataǵy beriledi jáne olar dıplommen, tósbelgilermen, ár nomınasııa boıynsha 600 myń tenge kóleminde aqshalaı syılyqtarmen marapattalady.
«Konkýrsqa 29 jasqa deıingi Qazaqstan Respýblıkasynyń jas azamattary qatysa alady. Úmitker halyqaralyq jáne respýblıkalyq konkýrstardyń, festıvaldar men kórmelerdiń laýreaty, respýblıkalyq jáne halyqaralyq deńgeıdegi sporttyq jarystardyń júldegeri jáne jeńimpazy bolýy tıis, sondaı-aq onyń qyzmeti ınnovasııalyq bolýy jáne tıisti sala men jalpy qoǵamnyń damýyna yqpal etýi tıis», delingen habarlamada.
Syılyq alýǵa kandıdatýralardy memlekettik organdar men qoǵamdyq birlestikter usynady.
Memlekettik organdar, qoǵamdyq birlestikter jáne ózge de zańdy tulǵalar ýákiletti organǵa (QR AQDM Jastar jáne otbasy isteri komıteti) mynadaı qujattardy qaǵaz jáne elektrondyq túrde jiberedi:
1) kandıdattyń jeke kýáliginiń kóshirmesi;
2) osy Qaǵıdalarǵa qosymshaǵa sáıkes nysan boıynsha tirkeý ótinimi;
3) qoldaýhat pen syılyq alýǵa izdenýshiniń jetistikteri týraly anyqtama;
4) marapattaý dıplomdarynyń, gramotalarynyń, alǵys hattarynyń kóshirmesi (bolǵan jaǵdaıda);
5) kandıdattyń nemese kandıdat týraly maqalanyń, jarııalanymdardyń kóshirmesi (bolǵan jaǵdaıda);
6) kandıdattyń jetistikterin rastaıtyn ózge de materıaldar (bolǵan jaǵdaıda).
Marapattaý rásimi Qazaqstan Respýblıkasynyń Táýelsizdik kúnine oraılastyrylady.