Almatynyń sheti men Almaty oblysynyń jaqyn ornalasqan aımaqtaryn damytý máseleleri boıynsha keńes ótti. Onyń jumysyna Almaty ákimi Baqytjan Saǵyntaev jáne Almaty oblysynyń ákimi Amandyk Batalov qatysty.
Kezdesýdiń maqsaty – megapolıstiń shet jáne oblystyń shekaralas eldi mekenderi turǵyndarynyń áleýmettik problemalaryn ózara aqyldasa otyryp sheshý. Negizgi máseleler qurylymy anyqtaldy, olar – turǵyn úı men áleýmettik obektiler salý, kólik-jol ınfraqurylymyn damytý, azyq-túlik qaýipsizdigin qamtamasyz etý jáne týrıstik áleýetti damytý. Kásipkerlikti damytý arqyly eńbekpen qamtý men jumys oryndaryn ashýǵa nazar aýdaryldy.
Almaty ákiminiń orynbasary Muhıt Ázirbaev óziniń sózinde qoljetimdi úı salý úshin qalada bos jerdiń tapshy ekenin aıtty. Turǵyn úıge degen suranys qurylys qarqynynan basym. Úı kezegindegiler sany jyl saıyn 10%-ǵa artyp, 2400 myń adamdy quraıdy. Máseleni sheshýdiń bir joly 2015 jylǵy tájirıbe boıynsha oblys aýmaǵynda turǵyn úı salý, sol kezde Almaty qalasynyń 900-den astam úı kezegindegiler Qarasaı aýdanyndaǵy «Asyl Arman» TK páter alǵan bolatyn.
Kólik qatynasyn damytý úshin qala ákiminiń tapsyrmasy boıynsha qala mańyna tasymaldaýmen qalalyq mýnısıpıaldy jáne jeke avtoparkter aınalysatyn bolady. Qyzmet kórsetý sapasyn arttyrý úshin tasymaldaý erejesi kúsheıtiledi. Bilim basqarmasy tasymaldaýshylarmen jáne kolledjdermen birge júrgizýshiler men servıstik qyzmetshiler quramyn oqytý men qaıta oqytýdy qolǵa alady. Mindet – jalpy júrgizýshilik mádenıetin arttyrý.
Aıta keterligi, kólik ótkizý qabiletin arttyrý úshin qalada jolaıryqtar salynyp, úńgileý jumystary júrýde. «Altyn-Orda» bazary mańyndaǵy joldy tez arada keńeıtý qajet. Radıaldy joldar jyldamdatqan jón. Jańa jol qubyrlary men ınjenerlik jelilerdi salý kelisip atqarylady.
Almatyny azyq-túlikpen qamtamasyz etý – úılesken is-qımyldy qajet etetin mańyzdy máseleniń biri. Almaty – elimizdiń iri tutyný naryǵy. Sońǵy 5 jyl ishinde qala turyǵndarynyń sany 20%-ǵa ósip,1,8 mln adamnan asty. Áleýmettik mańyzy bar azyq-túlikterdi - kókónisti, et pen sút ónimderin, jemis-jıdekti, túrli jarmalardy tutynýdyń jyl saıynǵy kólemi 1,1 mln tonna.
Almaty oblysy qalaǵa aýylsharýashylyq ónimderin basty jetkizýshi bola alady. Alaıda, qazir tutyný kóleminiń jartysynan azy ǵana jetkizilýde.
Aýylsharýashylyq ónimderin tasymaldaý men jetkizý júıesin aradaǵy deldalsyz durys jolǵa qoıý turǵyndarǵa qoljetimdi ónimder satyp alýǵa múmkindik beredi.
Almaty ákimi eńbekpen qamtý jáne jumys oryndaryn ashý máselesine erekshe nazar aýdardy. Ol úshin shet aımaqtar men qalaǵa jaqyn ornalasqan eldi mekenderde turǵyndar qajettiligi men eńbek naryǵyn eskere otyryp, shaǵyn jáne orta bıznesti damytý qajet.
Jańa jumys oryndaryn ashýdyń draıveri týrıstik áleýetti damytý bolyp tabylady. Mamandardyń málimeti boıynsha Almatyǵa kelgen sheteldik týrısterdiń 80 prosenti oblystyń týrobektilerinde bolýdy qalaıdy eken.
Qoljetimdilik pen jaıly jaǵdaıdy qalyptastyrý úshin kólik jáne joljıegi ınfraqurylymdaryn damytý qajet. Almatydan yńǵaıly avtobýstarmen shyǵatyn týrısterdiń Almaty oblysynda ornalasqan ulttyq parkterde bolýyn uıymdastyrǵan jón.
«Búgingi áńgimeniń Almaty men Almaty oblysynyń shekaralas aımaqtarynda jańa ıgilikti isterdiń paıda bolýyna yqpal etetinine senimdimin. Bul bizdiń birigip atqaratyn aýqymdy jumystarymyzdyń bastaýy bolady», dep atap ótti B. Saǵyntaev.
ALMATY