Kóp jyl boıy dindar áıelderge qyzmet kórsetken tarıhı ǵımarat jaıly eski kózder bolmasa bylaıǵy jastar bile bermeıdi.
Jambyl aýdanyna qarasty Presnoredýt eldi mekeni mańynda 1896 jyly salynǵan ǵıbadathana áli tur. Osy aýyldyń týmasy Vladımır Hamazınniń kýálik etýine qaraǵanda, aýmaǵy 100 sharshy metrdi quraıtyn ekiqabatty nysan erekshe arhıtektýralyq stılde turǵyzylǵan. Bıiktigi tórt metrge jeteǵabyl. Jertólede áıelder tiginshilikpen, basqa da turmystyq zattar jasaýmen aınalysqan.
«Osy óńirde týdym, sodan beri kindigim bir eli ajyraǵan emes. Bul tóńirekte ǵıbadathananyń tarıhyn menen jaqsy biletin adam joq shyǵar. Eger jańylmasam, Mıhaıl Kazın degen kazak ofıseri áıeli Anna Vasılevna ekeýi turǵyzǵan desedi. Olarǵa stanısa turǵyndary járdemdesipti. Bastapqyda 13 dindar áıel tursa, keıin qatarlary tolyǵyp otyrǵan. Sóıtip sany júzge deıin jýyqtaǵan», deıdi kóne kóz qarııa ótkendi oısha elestetip.
Qudaıǵa qulshylyq etken jandar úı sharýasymen qatar astyq, mal ósirip, kúndelikti taǵammen ózderin qamtamasyz etken. Aıdyndy kólge aý quryp, balyq aýlaǵan.
1921 jyly ǵıbadathananyń qyj-qyj qaınap jatqan tirshiligi birjola toqtaǵan. Oǵan kazaktar men sharýalardyń keńes ókimetine qarýly qarsylyǵy sebep bolǵan. Kóterilis kúshpen basyp-janshylyp, monastyr qıratylǵan. Ǵıbadathananyń basshysy men taqýa áıeler ólim jazasyna kesilip, osy mańaıǵa jerlengen. Keıin balalar úıine aınaldyrylyp, 1966 jyldan beri qaraýsyz qalǵan.
Jergilikti ólketanýshy Aleksandr Lıstopadnyı 2017 jylǵy sanaq málimetterine súıene otyryp, ǵıbadathananyń menshiginde 15700 gektar jeri, 20-ǵa jýyq tehnıkasy, onnan astam turǵyn úı, eki jataqhana, shirkeý, emdeý mekemesi, qyzmetkerlerge arnalǵan jeke úı, dıirmen bolǵanyn aıtady. Alty dindar 119 qyz-kelinshekke dáris bergen.
Soltústik Qazaqstan oblysy