Ystyq jaz bıyl Alataýǵa erekshe yqylas tanytty bilem, biz máńgilikke balap júrgen muzdyqtar erip, aǵyl-tegil jylǵa bop aǵyp, tóbesimen kók tiregen bıik shyńdardy shomyldyryp ótti. Endi mine, taý jasaryp, tula boıy túp-túgel kúnge kúıgen qaıratty jigitteı qasqaıyp, kúlimsirep qaraıdy.
Bókterdegi saıabaq tamyzdyń kúıin shym-shymdap shertip, qustary saırap, tıinderi sekirip oınap, kóz ben kóńildi birdeı qyzyqtyrady. Ońtústik Koreıadan kelgen bir top týrıst jasyl shyrshalar men gúlzar baqtardyń janynda sýretke túsip, óz tilderinde bir-birine ázil aıtyp kúlisip, máz-meıram bolyp barady.
Kókterektiń kóleńkesindegi sákide japadan jalǵyz kitap oqyp otyrǵan meniń janyma kenet, qaıdan shyǵa kelgeni belgisiz, eki ıyǵy qýshıǵan, shúńirek kóz qart kisi tize búgip, otyra ketti. Sóıtti de qolymdaǵy uıaly telefonyma qarap:
– Ne bop barady ózi? – dedi ıek qaǵyp. – Kórshi elde jurt kóshege shyǵyp jatyr deı me?..
Taý bókterindegi tabıǵat kórinisterine tańǵala qarap, maýjyrap otyrǵan meniń kóńilim kútpegen jerden myltyq daýsyn estigen balapandaı búrisip, jıyryla qaldy.
Áıtkenmen ol menen jaýap kútken joq. Búgingi jańalyqtardy ózi táptishtep, tize jóneldi. Kóz ilese almaıtyn zymyran jyldamdyǵyn ólsheýge mınýttyń ózi mımyrt, shaban bolyp kórinetin aqparattardyń bir qııameti, shetinen jaǵymsyz, jaǵa ustatardaı úreıli...
Osy sátte saıabaqtaǵy jasyl jelekke sý seýip júrgen qyzǵylt sary kúrteli qyzmetshi áıel biz otyrǵan tusqa jaqyndaı berdi. Ottaı ystyq kúnniń aptabynan qorǵanǵany bolar, basyndaǵy qyzǵysh kepkasynyń astynan juqa aq oramal tartyp, kózine úlken qara kózildirik taǵypty. Sý shashatyn shlangyny bir qolymen ustap, ekinshi qolymen uıaly telefonyn qulaǵyna taqap, áldekimmen sambyrlap sóılesip keledi.
– Áı, oǵan aıt, qur bosqa qarap jata bermeı, jumysqa shyqsyn. Osy kúnde «eki qolǵa – bir kúrek» qaıdan da bolsa tabylady. Anaý bolmady, mynaý bolmady dep, ýaıymdaı bergen adam ózin-ózi ishteı jep taýysqannan basqa túk bitirmeıdi. Báriniń daýasy – eńbek, – deıdi.
«Estigen qulaqta jazyq joq» ekeni ras. Kóńilim birtúrli elegizip, qasymdaǵy kisiniń góı-góıin tyńdaýǵa zaýqym soqpaı, ornymnan turdym da, aıańdap kete bardym.
Áýdem jer uzaǵan kezde artyma burylyp qarasam, kókterektiń kóleńkesinde qalǵan sur kóılekti kisi izim-ǵaıym joq bolypty. Shamasy, ol taǵy da bir qulaqtyń mazasyn alaıyn dep, saıabaqty sharlap júrse kerek. Al qyzyl sary tústi kúrteshe kópke deıin jarqyrap kóz aldymda turdy.