Kóktemde keýrektiń sarǵysh gúlderi kún sáýlesine shaǵylysqandaı jalt-jult etip, kózdiń jaýyn alady. Bilmeıtin kisi bir túıir japyraǵyn úzip alyp ıiskese, qolyna shaıyr-shiresi juǵyp, kópke deıin ketire almaı áýrege túsedi.Biraq qansha ádemi bolǵanymen, biz ony sasyq shóp deıtinbiz. О́ıtkeni keýrektiń ózeginde bir jaǵymsyz, ólekse ıis bolady. Alda-jalda aýyldyń keıbir qomaǵaı sıyrlary kúrtildetip jep qoısa, olardyń sútin birtalaı kúnge deıin ishe almaı, aıran uıyta almaı, aǵarǵansyz otyryp qalatynbyz.Bıyl kóktemde elge barǵanymyzda baıaǵy sol keýrek ósetin jerlerden oıdym-oıdym shuqanaqtardy kórip, ań-tań boldyq. Sarǵysh gúli kúnge shaǵylysqandaı kózdi arbap turatyn sasyq shóp izim-ǵaıym joq... – Apyr-aý, – deımin at arqandap júrgen nemere aǵama qarap, – túp-tamyrymen otap tastaǵansyńdar ma, nemene?Ol qolyndaǵy jańa ǵana qazyq qaqqan jumyr tasty alaqanymen salmaqtap-salmaqtap turdy da, anandaı jerge laqtyryp tastady. Sodan soń:– Biz emes ony qurtqan, – dep áldekimge keıigendeı dúńk ete qaldy.Onyń daýsynan kúreń at sekem alyp, basyn kegjıtip, aıaq astynan seni ne jyn qaqty ma degendeı osqyryndy.Azdan soń aǵam sabasyna túsip, alaqanyna juqqan shańdy qaqqyshtap turyp:– Bir-eki jyl boldy, keýrek – naǵyz dári shóp eken, bálenbaı degen sheteldik fırma, tamyryn qazyp aparyp ótkizgen kisilerge túgenbaı teńge tólep, qolma-qol satyp alady eken degendi estip, osy aýyldyń kúrek ustaýǵa jaraıtyn adamdarynyń barlyǵy adyrǵa shyqty. Sóıtip mine, aqyry... osylaı boldy.Meniń oıyma «Joǵalǵan pyshaqtyń saby altyn» degen maqal oraldy. Aǵamnyń ishindegi qyjyl endi maǵan aýysa bastady. Apyr-aı, ánsheıinde sasyq shóp dep murnymyzdy shúıirip, alystan oraǵytyp ótetin keýrek te kiltin tapqan kisige ishindegi bar asylyn aqtaratyn qupııa qazyna eken-aý! Sony nege bilmegenbiz?..– E-e, qaraǵym-aı, – deıdi aǵam, – bu tabıǵatta jaman nárse bolýshy ma edi...– Sonda keýrektiń dári shóp ekenin buryn da bilýshi me edińizder?Ol alysta umyt qalǵan bir nárseni esine túsirgendeı az-kem únsiz turyp:– Burynǵynyń kisileri: «Ishinde jeli bar adam keýrekti qaınatyp, sýyna tússe jazylyp ketedi» deýshi edi. Odan basqasyn bilmeımin, – dep basyn shaıqady. – Shyndyǵynda osy, bilmestigimiz ǵoı bizdi qurtatyn...Men onyń kóńilin keýrektiń dámindeı ashy ókinish tyrnap jatqanyn sezip, únsiz qaldym.