Taýda joǵalǵan alpınısterdiń spýtnıktik telefony óship tur, baılanys operatorlary qońyraý shalynǵan jerdi anyqtaı almaı otyr. Bul týraly Almaty qalalyq Tótenshe jaǵdaılar departamentiniń qyzmetkerleri málimdedi dep habarlaıdy QazAqparat tilshisi.
«Bizdiń tótenshe jaǵdaılar bólimi joǵalǵan alpınısterdi qutqarý jumystaryna tikeleı qatyspaıdy, biraq joǵalǵandar Almaty turǵyndary bolǵandyqtan, suraqtaryńyz bizge keledi. BAQ-ta bul oqıǵaǵa qatysty barlyq jańalyqtar aıtylyp jatyr. Biz esh jerde aıtylmaǵan aqparatpen bóliseıik. Alpınısterde «Týraıa» spýtnıktik telefony bar, ol sońǵy ret 15 tamyzda baılanysqa shyqqan. Baılanys operatorlary qońyraý túsken jerdi áli anyqtaı almady. Qurylǵynyń óship turǵany belgili boldy, múmkin qýatty taýsylǵan bolar. Mundaı qurylǵylar -40-tan +40 gradýsqa deıingi temperatýrada jumys isteıdi», - dep habarlady Almaty qalalyq Tótenshe jaǵdaılar departamentindegiler.
«Budan basqa, kez-kelgen daıyndalǵan alpınıst - eriktiler qutqarý jumystaryna qatysa almaıdy, jaqynda ǵana tómengi bıiktikte beıimdelýden ótken adamdar qajet. Bul talaptardy jaqynda jarystan oralǵan QR QM-niń alpınıstik komandasy oryndaıdy. Biz olardyń kásibı sheberligi men avıasııalyq jumystar úshin qolaıly aýa-raıy bolady degennen úmittenemiz. Qazirgi ýaqytta izdestirý-qutqarý toby oqıǵa ornynan ushyp ketti», dep atap ótti tótenshe jaǵdaılar salasynyń ókilderi.