Asa kórnekti memleket jáne qoǵam qaıratkeri, Qazaq KSR Ǵylym akademııasynyń akademıgi, úsh márte Sosıalıstik Eńbek eri, Qazaqstan Kompartııasy Ortalyq komıtetiniń birinshi hatshysy Dinmuhamed Qonaevtyń ómirden ótkenine bıyl 26 jyl tolyp otyr. Osy jyldarda qazaqtyń birtýar azamatynyń eren eńbegin, elge etken qyzmetin dáriptep, bolashaqqa jetkizýde Qonaev atyndaǵy Halyqaralyq qor jumys istep keledi. Qyryq jyldan astam ómirin basshylyq qyzmetke arnaǵan tulǵanyń júrip ótken joly búginde jas urpaqqa ónege. Osylaısha tulǵa esimin dáripteýdi maqsat ete otyryp jaqyndary Qazaqstan baspasóz klýbynda www.kunayev.kz saıtynyń tanystyrylymyn ótkizdi.
Saıt qoryna qaıratker ómiriniń barlyq jyldaryn qamtıtyn beıne materıaldar, ómirnamalyq derekter, erekshe sýretteri men zamandastarynyń estelikteri, sol jyldardaǵy eldiń áleýmettik-ekonomıkalyq kórsetkishteri, sóılegen sózderi men jarııalaǵan maqalalary engizilgen. Osy týraly jáne joba týraly ózge de aqparatpen Qazaqstan jýrnalıstıka akademııasynyń akademıgi Valerıı Jandáýletov bólisti.
«Áýezov úıi» ǵylymı-mádenı ortalyǵynyń jetekshisi, D.Qonaevtyń jıeni Dıar Qonaev «Dinmuhamed Ahmetulynyń esimi ulyqtalyp, atyna kósheler, joǵary oqý oryndary, mýzeıler berilgenimen de osy saıtty jasaý barysynda tulǵanyń ómiri men qyzmetine qatysty málimetterdiń az ekendigine kóz jetkizgendeı boldyq. Sondyqtan da naqty derekter, aqparattarmen qamtamasyz etý maqsatynda jaqyndary bolyp, qordyń qoldaýymen saıtty kópshilik nazaryna usynyp otyrmyz. Qonaevtyń bar ómiri memleket ómirimen tyǵyz baılanysta ótti. Saıt qoryna Ortalyq memlekettik arhıvi, sondaı-aq QR Prezıdentiniń arhıvinen kóptegen derekter izdestirilip, eki jyl kóleminde birneshe myńdaǵan málimet jınaldy» dep atap ótti.
Dıar Qonaevtyń aıtýynsha, bul qujattardyń ishinde ásirese, Qazaq KSR Mınıstrler Keńesi tóraǵasynyń orynbasary bolyp qyzmet etken jyldar ereshelenedi. Qyzmet barysynda Dinmuhammed Ahmetuly qorǵanys ónerkásibine jetekshilik etti. Jasy otyzdyń ústindegi jas basshy úshin jaýapty jumystardy atqarý árıne ońaıǵa soqpaǵany anyq.
«Soǵys jyldarynda Qazaqstannyń qorǵanys ónerkásibiniń áleýeti senimdi tyl retinde qyzmet ete otyryp, maıdanǵa jiberilgen on oqtyń toǵyzy Qazaqstan jerinde óndirildi. Qonaev el ekonomıkasynyń eń kúrdeli salalaryn basqardy. Tulǵa qyzmetiniń ár kezeńine tán ózindik sıpaty bar. Al Qazaqstan Ǵylym akademııasynyń Prezıdenti bolǵan jyldarda da ıyǵyna aýyr júk tústi. Taý-ken salasynyń eń iri ári kórnekti ókili retinde ózine artylǵan júkti minsiz atqaryp shyqty. Ortalyq komıtetke kelgende de Almatyny selden saqtap qalýda irgeli jumystar júrgizdi. Sonyń nátıjesinde sý bógeti salyndy. Ol eldiń basshysy ǵana emes, ǵalym bolǵandyqtan da qalany selden qorǵap qaldy. Alaıda osyndaı aýyrtpalyqtardyń saldarynan júrek talmasyna ushyrady» degen oıymen bólisken Dıar Qonaev saıt materıaldarynyń áli de tolyǵa túsetindigin jetkizdi.
«D.A.Qonaev atyndaǵy Halyqaralyq qor qurylǵaly bergi aralyqta týǵan ári ómirden qaıtqan kúni mindetti túrde eske alyp, tulǵanyń artynda qaldyrǵan mol murasyn jastar arasynda nasıhattaýǵa baılanysty jumystardy jalǵastyryp kelemiz. Búginde qalyń kópshilik Dinmuhammed Qonaev týraly tek ǵalamtor jelisinen alatyndyqtan, materıaldardyń naqtylyǵyna, dáldigine kúmán týyndaıdy. Sondyqtan da arnaıy saıttyń ashylýy tulǵa ómiriniń barlyq kezeńderinen naqty málimetter beredi ári osy baǵytta bizder jumys isteıtin bolamyz» dep atap ótti Halyqaralyq qordyń Bas dırektorynyń orynbasary Tımýr Jumanov.
Al tulǵanyń jıen nemeresi Muhtar Qonaev qaıratker murasyn jastar arasynda nasıhattaýda áleýmettik jeliler boıynsha da jumystardyń júrgizilip jatqandyǵyn jetkizdi. Búginde jastar tarapynan memlekettigimizdiń qalyptasýy men damýy jolynda eńbek etken tulǵalar ómirine degen qyzyǵýshylyq baıqalady. Sondyqtan da zamanaýı aqparat kózderin Qazaqstannyń qalyptasý tarıhyn nasıhattaý úshin paıdalaný qajettigin atap ótti.
Shara barysynda Qazaqstan jýrnalıstıka akademııasynyń prezıdenti, akademık Saǵymbaı Qozybaev, Qazaqstan dıplomattary birlestigi jetekshisiniń orynbasary Maqsat Nurmaǵambetov, QR SIM Almaty qalasy ókildiginiń Basqarma jetekshisi Almasha Arenova sóz sóılep, Qonaevtar áýletine qatysty estelikterimen bólisti.
Joba jetekshileri aldaǵy ýaqytta D.A.Qonaevtyń qyzmeti men ómirin zertteý, nasıhattaý maqsatynda áriptestikke daıyn ekendikterin bildirdi.
ALMATY