Densaýlyq saqtaý mınıstri Eljan Birtanov aımaqtardaǵy Densaýlyq saqtaý basqarmalarynyń, respýblıkalyq densaýlyq saqtaý uıymdarynyń, medısınalyq joǵary oqý oryndarynyń jáne sarapshylardyń qatysýymen keńes ótkizdi dep habarlaıdy DSM Baspasóz qyzmeti.
Keńeste náreste men bala ólimin azaıtý boıynsha 2019-2021 jyldarǵa arnalǵan memlekettik jospardyń oryndalý barysy qaraldy. Respýblıkalyq densaýlyq saqtaýdy damytý ortalyǵynyń (RDSDO) bas dırektory Aınur Aıyphanovanyń málimetinshe, 2019 jyldyń 7 aıynda Jambyl oblysy (80,5%) men Batys Qazaqstan oblysynda (81,6%) jospar eń tómen paıyzda oryndalǵan.
Negizgi nátıjelik kórsetkishterge júrgizilgen monıtorıng qorytyndysy boıynsha (NNK) 4 NNK-niń 3-ne Aqmola, Aqtóbe, Mańǵystaý jáne Túrkistan oblystary qol jetkizbegen. Batys Qazaqstan jáne Qyzylorda oblystarynyń Densaýlyq saqtaý basqarmalarynda 4 NNK-niń bireýi de oryndalmaǵan. Sondaı-aq Aqmola, Aqtóbe, Shyǵys Qazaqstan, Pavlodar oblystarynda jáne Almaty, Nur-Sultan qalasyndaǵy medısınalyq uıymdardyń basshylary 2 NNK oryndamaǵan.
Atap aıtqanda, Aqmola, Almaty, Qostanaı, Mańǵystaý jáne Soltústik Qazaqstan oblystarynda prenataldy ınvazıvti dıagnostıka jáne sapaly sıtogenetıkalyq saraptaý júrgizilmegen. Jergilikti bıýdjet qarajatynan Atyraý, Jambyl, Qaraǵandy, Qostanaı, Qyzylorda, Mańǵystaý, Pavlodar oblystarynda saraptamalyq klasty ÝDZ apparaty satyp alynbaǵan.
Pedıatr mamandarymen qamtamasyz etý boıynsha eń tómen kórsetkish Mańǵystaý (64%), Nur-Sultan (76,6%), Qyzylorda (78,5%) oblystarynda; neonatologtarmen qamtamasyz etý boıynsha eń tómengi paıyz - Mańǵystaý (65%), Soltústik Qazaqstan (74%) oblystarynda, Shymkent qalasynda (77%); balalar anestezıolog-reanımatologtary boıynsha - Mańǵystaý (49%), Batys Qazaqstan (66%), Nur-Sultan qalasynda (73%) baıqalady.
Densaýlyq saqtaý mınıstri óńir basqarmalary men medısınalyq uıymdardyń basshylaryn jospar boıynsha jumysty jandandyrýǵa shaqyrdy.
- Naqty sharalar bar. Olardy oryndamaǵan uıym basshylary jalpy jáne jeke jaýap beredi. 9 aıdyń qorytyndysy boıynsha Densaýlyq saqtaý basqarmasy basshylaryn tártiptik jaýapkershilikke tartý máselesin kóteretin bolamyz. Jyldy qorytyndylaǵan kezde ákimderdiń NNK jetistigi de kórinedi, - dedi E.Birtanov.
Sonymen qatar otyrysta densaýlyq saqtaý kórsetkishterin statıstıkalyq esepke alýdyń naqtylyǵy men tolyqtyǵyn qamtamasyz etýdiń mańyzdylyǵy erekshe atap ótildi. Densaýlyq saqtaý mınıstrliginiń bastamasymen 2018 jyly Qazaqstan boıynsha óli týǵan nárestelerge saraptama júrgizildi. Onyń qorytyndysyn Taýarlar men qyzmetterdiń sapasy men qaýipsizdigin baqylaý komıtetiniń tóraǵasy Lıýdmıla Bıýrabekova baıandady. Saraptamada ótken jyly óli týǵan balalardyń 81,1% qamtylǵan. Mańǵystaý oblysy aqparat bermedi, Almaty, Qostanaı, Aqmola, Qaraǵandy, Aqtóbe oblystary jartylaı málimet usyndy. Saraptama nátıjesinde erte neonataldyq ólim-jitim boıynsha derekterdiń esepke alynbaǵany anyqtaldy.
Osyǵan baılanysty E. Birtanov sábı ólimine qatysty naqty statıstıka jasaý úshin bul jumysty áli de birneshe jyl jalǵastyrý qajettigin aıtty. Sonymen qatar ol bir aı merzimde patologoanatomııalyq qyzmetti jetildirýdiń Jol kartasyn ázirleýdi tapsyrdy.
Densaýlyq saqtaý vıse-mınıstri Lázzat Aqtaeva Densaýlyq saqtaý basqarmalarynyń basshylaryna medısınalyq uıymdardyń statıstıkany burmalap, jalpy ana men bala ólimin jasyrýdy toqtatýyn jáne memlekettik statıstıkalyq esepti burmalaǵandar jaýapkershilikke tartylatynyn eskertýdi tapsyrdy.
"Pedıatrııa jáne balalar hırýrgııasy ǵylymı ortalyǵy" AQ Basqarma tóraǵasy Rıza Boranbaeva 2019 jyldyń 7 aıynyń qorytyndysyna sáıkes elimizde balalar onkologııalyq jáne gematologııalyq qyzmetin jetildirý boıynsha Jol kartasyn oryndaýǵa qatysty esep berdi. Sonymen qatar óńirlerge de birqatar tapsyrma berildi.
Densaýlyq saqtaý mınıstri jańa týǵan náresteler men balalardyń densaýlyǵyn saqtaý máselesi Memleket basshysynyń baqylaýynda ekenin atap ótti. E.Birtanov aıtqandaı, Qazaqstanda balalardyń densaýlyǵyn jaqsartý úshin densaýlyq saqtaý júıesiniń árbir qyzmetkeri óz mindetterin jaýapkershilikpen oryndaýy tıis.