Temir aýdanynyń ortalyǵy Shubarqudyq kentinde erekshe qajettiligi bar balalarǵa arnalǵan «Ainala» emdeý – ońaltý ortalyǵy ashyldy, dep habarlaıdy Egemen.kz.
Bul jerde densaýlyǵynda kinaraty bar 3-18 jas aralyǵyndaǵy balalarǵa medısınalyq, psıhologııalyq jáne pedagogıkalyq keshendi qoldaý kórsetiledi.
Jyl saıyn ortalyqta shamamen 840 bala emdik-saýyqtyrý sharalarynan ótpekshi. Munda kúndizgi emdik kýrstaryna arnalǵan jáne jatyp emdeletin bólimsheler, dıagnostıkalyq kabınetter, deneshynyqtyrý zaldary, tuz shahtasy, balanyń sezim múshelerin damytýǵa jáne minez-qulqyn retteýge arnalǵan sensorlyq jáne ınteraktıvti jabdyqtar, ımmersııalyq vanna, arnaıy eńbek quraldarymen jabdyqtalǵan sheberhanasy bar. Mekemege birneshe psıholog, logoped, defektolog jáne arnaıy emdik-deneshynyqtyrý jattyqtyrýshylary, nevrolog mamandar jumysqa qabyldandy.
Joba «Samruq-Qazyna» AQ-nyń Samruk –Kazyna Trust korporatıvti qaıyrymdylyq qory men «Baquatty Aimaq Qory» jáne Aqtóbe oblysy ákimdiginiń qoldaýymen iske asyryldy.
Aıta ketý kerek, Aqtóbe oblysynda 6 myńnan astam múgedek bala bar.