Bas shaharda qazaqstandyq-amerıkalyq jastar forýmy ótti. Jastar uıymdarynyń arasynda baılanys ornatý jáne tájirıbe almasý maqsatynda eki eldiń belsendileri volonterlik qozǵalysty damytýǵa ýaǵdalasty.
Jastar uıymdarynyń quryltaıyna qatysqan Aqparat jáne qoǵamdyq damý vıse-mınıstri Danııar Esın bıyl Qazaqstanda Jastar jyly jarııalanǵanyn, sondaı-aq elorda ıntellektýaldy entýzıast jastar shoǵyrlanǵan iri qala ekenin aıtty.
– Elimizdiń astanasyna kelgenderińizge qýanyshtymyz. Bul qalanyń erekshe mıssııasy bar. Elordamyz – beıbitshilik pen kelisimniń mekeni. Qýantarlyǵy, ásem shaharymyzda bitimgerlik mıssııany úndeıtin aýqymdy sharalar ótip turady. Onyń ishinde Álemdik jáne dástúrli dinı konfessııa basshylarynyń sezin atap ótýge bolady. Qazaqstandyq-amerıkalyq jastardyń birlesken forýmy ótip jatqanyna qýanyshtymyn. Osy jıyn jemisti bolar degen úmitimiz basym. Bizdiń memleketimizde jastar máselesine erekshe den qoıylǵan. Osy baǵytta ozyq tájirıbeler zerttelip, engizilip jatyr. Búginde eki el arasyndaǵy baılanysty tek memlekettik deńgeıde ǵana emes, sondaı-aq jastar arqyly nyǵaıtýǵa múmkindik bar. Bul forým sport, ǵylym jáne mádenıet syndy birneshe salalarda birlesken jobalardy iske asyrýǵa jol ashady dep oılaımyz, – deıdi D.Esın.
Forým barysynda Bolashaq qaýymdastyǵy, «Azamattyq bastamalardy qoldaý» ortalyǵy jáne Kazakhstan Trade Council uıymdary arasynda úsh-jaqty memorandýmǵa qol qoıyldy. Sol sekildi eriktiler qozǵalysyn damytý úshin Jas Otan jastar qanaty, Indiana University Fencing Club, Astana jastary jáne World Can Soar halyqaralyq uıymy arasynda memorandým jasaldy.