Qaraǵandydaǵy quıý-mashına jasaý zaýytynyń otandyq naryqta jumys istep kele jatqanyna da 80 jyl boldy. Sońǵy tórt jylda kásiporyn keń aýqymdaǵy jańǵyrtý úderisine bet túzegen bolatyn. Buǵan deıin shahtaǵa qajetti qural-saıman, qurylǵylar jasap, kenshilerge qyzmet kórsetetin zaýyt endi taý-ken jabdyqtaryn jóndeý baǵytynda da óz kúshin synaı bastady. Mundaı múmkindikke kásiporyn «Qazaqmys» korporasııasy» JShS-niń quramyna engennen keıin qol jetkizgen edi. Búginde túgeldeı túlegen zaýyt ataýyn da ózgertip, «Meıker» JShS retinde tanymal bola bastady.
– Stanok parki, zerthanalar, uıymdastyrý tehnıkasy tolyq jańartyldy. Konstrýktorlyq-tehnologııalyq salaǵa biryńǵaı júıe engizildi. Bul jerde barlyq úderistiń eki jyl boıy júzege asyrylǵanyn atap ótken jón. Osy ýaqyt ishinde zaýyt úzdiksiz jumys istedi, – deıdi «Meıker» JShS-niń konstrýktorlyq-tehnologııalyq basqarmasynyń basshysy Vladımır Volynskıı.
Zaýyttyń zaman talabyna saı jańǵyrtylýyna memleket tarapynan kórsetilgen qoldaýdyń kóp kómegin tıgizgenin aıta ketken lázim. Joba «3.0 jańǵyrtý» ulttyq baǵdarlamasyna engen. Jańarý bastalǵannan bergi ýaqyt ishinde zaýytqa 53 birlik negizgi qural-jabdyq jáne 230 kómekshi qural-jabdyq jetkizildi. Onyń 35-i – Eýroodaq elderi men Ońtústik Koreıanyń jetekshi fırmalarynyń zamanaýı metall kesetin stanoktary.
Qazirgi tańda mehanıkalyq qurastyrý sehy tolyǵymen qalpyna keltirilgen, onda sandyq baǵdarlama arqyly basqarylatyn jańa stanoktardyń 80%-dan astamy jumys isteıdi. Mamandardyń aıtýynsha, munyń ózi eńbek ónimdiligin alty esege arttyrǵan.
Ras, bul jańǵyrtý basynda ońaıǵa túspedi. Shetelden qyp-qyzyl aqshaǵa satyp ákelgen qymbat qural-jabdyqtyń tilin biletin maman tappaı, qatty sasqan kásiporyn basshylary. Sóıtse, elimizde bir de bir joǵary oqý orny nemese kolledj sandyq baǵdarlama boıynsha basqarylatyn stanoktardyń ınjenerleri men operatorlaryn oqytpaıdy eken...
– Tyǵyryqtan shyǵarar jol izdedik. Sóıttik te, qyzmetkerlerimizdi ózimiz oqytýǵa sheshim qabyldadyq. Bul iske reseılik konsaltıngtik kompanııalardyń biri qolushyn berip, olar bastapqy kezeńde 52 ınjener men 70-ten astam jumysshyny daıarlaýǵa kómektesti. Keıin lısenzııalyq oqý baǵdarlamalaryn satyp alyp, praktıkalyq sabaqtar ótkiziletin kabınetti jabdyqtap aldyq. Sodan keıin Qaraǵandy memlekettik tehnıkalyq ýnıversıteti janynan ózimizdiń kafedramyzdy ashtyq. Endi bizdiń qyzmetkerler aptasyna eki ret stýdentterge dáris oqıdy. Alǵashqy «qarlyǵashtarymyz» eki jyldan keıin daıyn bolady, biz olardy ózimizdiń kásiporynda kútemiz, – deıdi V.Volynskıı.
Jasyratyny joq, qazirgi tańda tehnıkalyq joǵary oqý oryndary men kolledjderdiń jańǵyrtý úderisin bastan keship jatqan kásiporyndardyń qarqynyna ilese almaı kele jatqan jaıy bar. Eski júıe boıynsha oqytylǵan mamandardyń zamanaýı tehnologııalarmen jumys isteı bastaǵan zaýyttardyń mańynan da júre almaıtyny ekibastan belgili. Mine, osyndaı olqylyqtardyń barlyǵyn eskere kele, «Meıker» JShS ózine qajetti mamandardy osylaısha ózderi oqytyp, daıarlaı bastaǵan.
Búginde zaýytta 800 adam jumys isteıdi. Olar negizinen qosalqy bólshekter men asa kúrdeli jabdyqtardy shyǵarýmen aınalysady. Kásiporyn jyl saıyn óndiris kólemin ulǵaıtýǵa tyrysady. Aldaǵy ýaqytta ony taǵy da 30%-ǵa kóterý josparda bar eken. Munyń ózi Prezıdent Qasym-Jomart Toqaevtyń «Birge júzege asyramyz» baǵdarlamasynda kórsetilgen mindettermen úndesip jatyr. Al ol qujatta Memleket basshysy eńbek ónimdiligin arttyrýdy yntalandyrý, uzaq merzimdi básekege qabilettilikti qamtamasyz etýge jaraıtyn salalar men baǵyttardy anyqtaý, halyqaralyq sapa standarttaryn engizetin jáne óz ónimimen jańa naryqtarǵa shyǵatyn kásiporyndardy qoldaý jáne otandyq ónerkásiptegi sapany arttyrý jónindegi negizgi baǵyttardy aıqyndaǵan bolatyn. Budan bólek, el Prezıdenti jaqynda ǵana Qaraǵandyda ótken elimizdiń ındýstrııalyq-ınnovasııalyq damýy jónindegi keńeste «Biz ózimizdiń óndirýshilerdi barynsha qoldaımyz», dedi. Saıyp kelgende, mundaı oń kózqaras otandyq ónim shyǵaryp, ulttyq brendti qalyptastyrýǵa bar kúshin salyp kele jatqan Qaraǵandy zaýytynyń iskerlik turǵydaǵy kókjıegin keńeıte túseri sózsiz.
Qazir «Meıker» JShS taý-ken óndirýshi kásiporyndar úshin ǵana emes, basqa da ónerkásipshiler úshin de qosalqy bólshekter daıyndap, bes myńnan astam ónim túrin shyǵarýǵa qol jetkizgen. Negizgi tapsyrys berýshi «Qazaqmys» korporasııasy» JShS bolǵanymen, zaýyt basqa qazaqstandyq kompanııalarmen de iskerlik qarym-qatynas jasaıdy. Budan bólek, sońǵy ýaqytta shet memleketterden de yntymaqtastyq týraly usynystar kelip túsip jatqan kórinedi. Munyń ózi kásiporynnyń menedjmenttik jumysty da durys jolǵa qoıa bilýiniń nátıjesi dep senimmen aıtýǵa bolady.
QARAǴANDY