Májilis Spıkeri Nurlan Nyǵmatýlınniń tóraǵalyǵymen Palatanyń V sessııadaǵy alǵashqy jalpy otyrysy bastaldy. Bul týraly Májilistiń baspasóz qyzmeti habarlady.
Otyrys barysynda N.Nyǵmatýlın osydan eki kún buryn Memleket basshysy Qasym-Jomart Kemeluly Toqaevtyń kezekti sessııany ashyp, Parlament qabyrǵasynda óziniń tuńǵysh Joldaýyn jarııalaǵanyna nazar aýdardy.
«Memleket Basshysy Qasym-Jomart Kemeluly Toqaev óz Joldaýynda Elbasymyz Nursultan Ábishuly Nazarbaevtyń saıasatyn jalǵastyra otyryp, Qazaqstanymyzdy odan ári damytýdyń negizgi maqsattaryn belgilep berdi. Olardyń barlyǵyn zań jaǵynan qoldaý úshin depýtattyq korpýstyń aldynda da jaýapty mindetter tur. Sol úshin sessııa barysynda, biz, óz ýaqytynda, halyqqa qajetti, sapaly zańdar qabyldaıtyn bolamyz»,-dedi Palata spıkeri.
Osy jaýapty mindetti abyroımen atqarý úshin búginnen bastap belsene iske kirisý qajettigin eske salǵan Májilis Tóraǵasy ásirese, ekonomıkany jańǵyrtýǵa áleýmettik ahýaldy kúsheıtýge, bıýdjet jáne salyq júıesin jetildirýge, azamattardyń quqyqtary men bostandyqtaryn qorǵaýǵa, shaǵyn jáne orta bıznesti qoldaýǵa, ekologııalyq máselelerge basqa da suraqtarǵa erekshe kóńil bólinetinin atap ótti.