Búgin Nur-Sultanda Memleket basshysy Qasym-Jomart Toqaevtyń tóraǵalyǵymen Ulttyq qoǵamdyq senim keńesiniń alǵashqy otyrysy ótedi.
Ulttyq qoǵamdyq senim keńesi – Qazaqstan Prezıdenti janyndaǵy konsýltatıvtik-keńesshi organ.
Keńestiń negizgi maqsaty – jurtshylyqtyń, saıası partııalardyń, azamattyq qoǵam ókilderiniń qatysýymen memlekettik saıasatqa qatysty ózekti, mańyzdy máseleler boıynsha bastamalardy, usynystardy tujyrymdaý. Sonymen qatar tujyrymdamalardyń, memlekettik baǵdarlamalar men normatıvtik-quqyqtyq aktilerdiń jobalaryna qoǵamdyq saraptama júrgizý, jurtshylyqtyń, azamattyq qoǵamnyń pikirin eskere otyryp mańyzdy strategııalyq problemalardy qaraý, syndarly dıalogty qamtamasyz etý – keńestiń negizgi mindetteri.
Ulttyq keńes quramyna saıası partııalar ókilderi, qoǵam belsendileri, sarapshylar, jastar uıymdarynyń kóshbasshylary engen.
Osyǵan deıin Prezıdent janyndaǵy Ulttyq qoǵamdyq senim keńesiniń Birinshi otyrysyn 2019 jylǵy 6 qyrkúıekte Nur-Sultan qalasynda ótkizý josparlanǵanyn habarlaǵan edi.