Elordalyq balabaqshanyń birinde balalardyń vırýstyq menıngıt juqtyrǵan eki jaǵdaıy tirkeldi. Osy sebepten dárigerler óz betimen em jasamaı, aldyn alý sharalaryn qatań ustanýǵa keńes beredi. Qazaqstan Respýblıkasynyń shtattan tys bas ınfeksıonıst-dárigeri, medısına ǵylymdarynyń doktory, professor, Astana Medısınalyq ýnıversıtetiniń balalar ınfeksııalyq aýrýlary kafedrasynyń meńgerýshisi Danagúl Baesheva ınfeksııalyq aýrýlardyń belgileri men sirli menıngıttiń qanshalyqty qaýipti ekenin aıtyp berdi. Bul týraly Nur-Sultan qalasy ákimdiginiń baspasóz qyzmeti habarlady.
Infeksıonıst-dárigerdiń aıtýynsha, ınfeksııalyq aýrýlar merzimge qaraı taralady. Máselen, jaz ben kúzdiń basy enterovırýstyq ınfeksııalardyń taralýyna qolaıly kezeń. Olardyń 85%-y adam boıynda eshbir belgi bermeıdi. Vırýs eki jolmen - aýa jáne tamaq arqyly juǵady.
«Vırýstar 50 gradýstan asqan temperatýrada joıylady, alaıda birneshe ret qatyrǵannyń ózine de shydaı beredi, al +4+6 gradýsta jáne sýda uzaq saqtalady. Olar ýltrakúlgin sáýleniń áserinen, keptirgende jáne qaınatqanda joıylady», - deıdi Danagúl Baesheva.
Dárigerdiń aıtýynsha, vırýstyq ınfeksııalardy kóbine 3-10 jas aralyǵyndaǵy balalar juqtyrady. Vırýs aýa arqyly da, tamaq arqyly da juqqandyqtan, keıde jedel respıratorlyq-vırýstyq ınfeksııa, bolmasa ótkir juqpaly ishek aýrýlary sııaqty ótýi múmkin, tek uzaǵyraq qaltyrap, qyzý kóteriledi. Sondaı-aq, bul kezde mıdyń jumsaq qabyǵy da qosylyp, sirli menıngıtke ákelýi múmkin.
«Enterovırýstyq menıngıt bakterııalyq túrine qaraǵanda qatersiz, odan adam tolyqtaı jazylyp ketedi»,- deıdi maman.