Qostanaıda Prezıdent Qasym-Jomart Toqaevtyń Qazaqstan halqyna arnaǵan Joldaýynyń negizgi baǵyttaryn talqylaý úshin aktıv jınalysy ótti. Oǵan oblystyq basqarmalar men departamentter basshylary, saıası partııalar fılıaldary, úkimettik emes uıymdar jetekshileri qatysty. Aýdandar men qalalar ákimderi men aktıvi beınebaılanys arqyly qosyldy. Elimizdiń odan ári damýy úshin júıeli reformalar júrgizýdiń qajettigin aıqyndap bergen Joldaýdy taldaýǵa olar belsendi atsalysty.
– Qasym-Jomart Toqaev saılaýaldy baǵdarlamasyn negizge ala otyryp, eń aldymen halyqtyń ıgiligi úshin qyzmet etetin úılesimdi memleket qurýǵa baǵyt aldy. Bul maqsatqa halyq pen bılik arasynda turaqty dıalog qurý arqyly ǵana qol jetkizýge bolady. Joldaýda ulttyq ekonomıka men bıznesti, ınfraqurylymdy damytýdyń mańyzdy mindetteri, halyqtyń birqatar áleýmettik máselelerin sheshý mindeti qoıyldy. Sondyqtan barshamyz birigip, Joldaýda belgilengen ózekti máselelerge súıene otyryp, ár salada naqty josparlar qurýǵa tıispiz, – dedi oblys ákimi Arhımed Muhambetov.
Aktıv jınalysynda óz pikirin bildirýshiler Joldaýda aıtylǵan máselelerdiń ózektiligine toqtaldy. Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlnár Ábenova Prezıdenttiń áleýmettik az qamtylǵan otbasylaryn demeý jóninde aıtqanyn sóz etti.
– Joldaýda kóp balaly otbasylardy baspanamen qamtamasyz etý máselesi aıtyldy. Bizdiń oblysta «Nurly jer» memlekettik baǵdarlamasy aıasyndaǵy «Baqytty otbasy» baǵyty boıynsha áleýmettik áljýaz otbasylarynyń baspanaly bolýy úshin 10 paıyzdyq alǵashqy jarnasymen 2 paıyzdyq jyldyq ústemesi bar jeńildetilgen kredıtpen aldaǵy úsh jylda oblysta 600 otbasy qonys toıyn toılaıdy. Bul úshin «Turǵyn úı qurylys jınaq bankke» qazirdiń ózinde 190 ótinish berildi, – dedi Gúlnar Ábenova.
Z.Aldamjar atyndaǵy Qostanaı tehnıkalyq-áleýmettik ýnıversıteti janyndaǵy ǵylymı-zertteý ınstıtýtynyń dırektory, zań ǵylymdarynyń doktory Sergeı Jalybın Prezıdent Joldaýyndaǵy aýyr qylmystarǵa qarsy zańdy qataıtý týraly máselelerge toqtaldy.
– Joldaý ýaqyttyń sıpatyna da, halyq kókeıindegi oılarǵa da jaýap beredi. Qazaqstanda jasalǵan aýyr qylmystar qoǵamdy túrshiktirip otyr. Jynystyq zorlyq-zombylyqqa, esirtki saýdasyna, pedofılııaǵa, basqa da aýyr qylmys túrlerine qarsy zańdy qataıtý qozǵaldy. Zańdy qataıtýǵa baılanysty qoǵamda qylmys jasalmasa da «qarasy juǵyp», bopsalaý faktileri oryn alýy múmkin degen pikirler estilip qalyp jatyr. Joldaýda aıtylǵan talaptardan mundaı máseleler týyndaýy tıis emes. Bul jerde áńgime tek istelgen aýyr qylmystyń jazasy týraly ǵana bolyp otyr, – dedi Sergeı Mıhaılovıch.
Sonymen qatar oblystyq kásipkerlik jáne ındýstrııalyq-ınnovasııalyq damý basqarmasy basshysynyń orynbasary Roza Gorıannaıa oblysta «Eńbek» baǵdarlamasy boıynsha osy jyly 77 jobaǵa 800 mıllıon teńge shaǵyn kredıt berilgenin aıtty. Keler jyldan bastap mıkro jáne shaǵyn kásipkerlerdiń úsh jyl boıy salyqtan bosatylýy olardyń jumysyn jeńildetip, bıznestiń ekonomıkalyq jáne áleýmettik jaýapkershiligin kóterýdi tezdetedi.
Talqylaýdy qorytyndylaǵan oblys ákimi Arhımed Muhambetov Joldaýdy halyqqa túsindirý jumystarynyń barynsha tez jáne tıimdi uıymdastyrylýyna qatysty tapsyrmalar berdi.
QOSTANAI