Bul týraly buqaralyq aqparat quraldary ókilderi úshin oblystaǵy óndiristik jáne áleýmettik nysandardyń qysqa daıyndyǵy týraly ótken brıfıngte oblys ákiminiń orynbasary Ǵaýez Nurmuhambetov baıandady. «Shanańdy jazda saıla» degen. Búginge deıin oblystaǵy 105 qazandyq, 736 derbes jylytý júıesi tolyq daıyn tur. Onyń syrtynda 18,3 shaqyrym jylý qubyrynyń jelisi, 91,6 shaqyrym sý jáne qanalızasııa qubyrlary jóndeldi.
«Bilim berý, densaýlyq, áleýmettik sala jáne kóp qabatty úılerdiń barlyǵy jylý qabyldaýǵa saqadaı saı. Osylardyń barlyǵyn jylý berý maýsymyna daıyndaý úshin qazir jylý júıesinde gıdravlıkalyq kúzgi synaqtar júrgizip, tekserilýde. Osyndaı jumys barysynda 32 qubyrlardyń aqaýlary tabyldy. Eń aýqymdy jumys «SSKО́B» aksıonerlik qoǵamynyń Rýdnyı jylý-energetıkalyq ortalyǵynda júrdi. Sońǵy úsh jylda jyl saıyn onyń jóndeý jumystaryna 5 mlrd teńge jumsalady» dedi Ǵaýez Torsanuly.
Bıýdjettik mekemelr men kásiporyndar úshin kómirdiń 88 paıyzy, al turǵyndar úshin qajetti otynnyń 70 paıyzy jetkizildi. Aralyq qalasy úshin de mazýt bıyl jetkilikti, qalany jylytýdy aldaǵy jyldary kómirge aýystyrý úshin júretin jumystardyń qujattary daıyndalýda.
Aýa raıy sýytqan jaǵdaıda qazannyń 1 – juldyzynan bastap jylý beriledi.