Elordada Astana Media Week ótip jatyr

Astana Media Week-tiń alǵa qoıǵan maqsaty – otandyq medıa sektordy damytý jáne saladaǵy iskerlik qatynastardy aımaqtyq deńgeıde ilgeriletý.

Byltyr AMW baǵdarlamasyna qatysý úshin eki myńnan astam qonaq jınalǵan edi. Sol joly medıa ındýs­trııanyń tetigin ustaǵan otandyq jáne sheteldik 60 top-menedjer men 50-den astam óndiristik kompanııa ózderin tanystyryp, ónimin kórsetken bolatyn. Al bıylǵy aptalyq túrli taqyryptardy qamtýmen, olardyń mazmunynyń qyzyqtylyǵymen erek­shelendi. Jıyn barysynda jaýapty mınıstrlik mańyzdy jobalar men tyń ıdeıalardy qoldaýǵa ázir ekenin bildirdi.

– Aqparat jáne qoǵamdyq damý mınıstrligi mass-medıanyń sapasyn arttyratyn kez kelgen bastamany qoldaýǵa árqashan daıyn. Sizderdi paneldik sessııalarǵa belsene qatysýǵa shaqyra otyryp, búgingi jáne aldaǵy jıyndarǵa tabys tileımin. Uıaly telefonnyń teledıdarmen jáne basylymdarmen básekege túskeni barshamyzǵa belgili. Bul úderistiń tehnologııalyq nemese marketıngtik qana emes, etıkalyq, demografııalyq jáne áleýmettik-saıası erekshelikteri de bar. Moıyndaý kerek, memleket úlken jáne ıkemsiz bıýrokratııalyq mehanızm retinde bul ózgeristerge biz oılaǵandaı jedel jaýa­p bere almaı otyr, – dedi Aqparat jáne qoǵamdyq damý mınıstri.

D.Abaevtyń atap ótkenindeı, memlekettik organdar úshin qa­zirgi ózgeris­terge jaýap berýde kásibı maman­dardyń pikiri men kózqarasy mańyzdy. Taǵy bir másele – medıasaýattylyqty arttyrý isine nazar aýdardy. – Memlekettik múddeni halyqqa jetkizip, qoǵamdaǵy ózgeristerge saı kózqaras qalyptastyrýda medıa salasynyń atqarar mańyzy zor. Osy oraıda elimizdiń aqparat quraldary aldynda úlken maqsat-mindetter tur. Ol Elbasy bastaǵan, Memleket basshysy qoldap otyrǵan saıası-ekonomıkalyq jáne rýhanı jańǵyrý jónindegi keshendi reformalarǵa jurtshylyqty jumyldyrý. Astana Media Week dıalog alańyn uıymdastyrýdaǵy negizgi maqsattardyń biri –  aqparat quraldary ókilderiniń bir-birimen tanysyp, pikir almasýlaryna jaǵdaı jasaý. Osylaısha, elimizdiń medıa salasyn ár taraptan emes, ortaq múdde aıasynda damytý degen nıetimiz bar. Bul aýqymdy sharanyń kózdegen taǵy bir maqsaty – el turǵyndarynyń medıasaýatyn arttyrý, medıamádenıetti qalyptastyrý.

Jıynnyń ashylý saltanatynan keıin birneshe seksııaǵa bólingen aýdıtorııalarda túrli taqyryptar qozǵaldy. Naq­ty­laı aıtqanda, jıynnyń alǵashqy kúni  otan­dyq serıaldar men kıno ındýs­trııasy salasyna qatysty taqyryptarǵa basymdyq berildi. Dıalog alańdarynda medıa mamandar saladaǵy salǵyrttyq, serıaldaǵy sapa, ekrandaǵy etıkadan bastap, jurttyń qyzyǵý­shylyǵyn týdyrý men qarjy tabý sekildi birneshe máseleni qozǵap, pikirlerimen bólisti.

Halyqaralyq spıkerlerdiń qatarynda Star Media kınokom­panııasynyń vıse-prezıdenti Nıkıta Trınkın, qytaılyq bel­gili prodıýser Ý Szıan, polıak rejıs­seri jáne prodıýser Darıýsh Iаblon­skı jáne úndistandyq NFDC halyqaralyq taratý jáne marketıng bóliminiń bastyǵy Dıplı Chaýla sekildi qonaqtar bolǵanyn aıta ketken jón. Olar basqosýda óz tájirıbelerimen bólisip, jýrnalısterdiń suraqtaryna jaýap berdi. Otandyq medıa mamandary úshin olardyń serıal túsirýdegi ozyq tásilderi qy­zyǵyraq boldy. Jıyn barysynda qazaqstandyq serıaldar men kıno týyndylardyń kemshilikteri men artyqshy­lyqtary da sóz boldy.

Aptalyq barysynda belgili bolǵandaı, Qazaqstanda aýdıtorııasy kóbeıip kele jatqan telearnalardyń qatary arta túsken. Oǵan taǵy bir sebep tól telehıkaıalarymyzdyń kóbeıip kele jatqandyǵy kórinedi. Muny kúndelikti ómirde kógildir ekrandy qalt jibermeıtin kórermen bizden jaqsy bilmese, kem bilmeı­ti­ni anyq. Osy rette mınıstr qazaqstandyq jáne sheteldik telearnalardy birlese otyryp jumys isteýge shaqyrdy. Bul úshin barynsha jaǵdaı jasaýǵa bolatynyn jetkizdi.

AMW aıasynda Qazaqstandaǵy alǵashqy – «ADTribune – Azııanyń jarnamalyq daýysy» atty konferensııasy ótedi. Onda saladaǵy máseleler, qıyndyqtar men trendter týraly ashyq aıtylady. Medıa aptanyń sońǵy kúni medıa mazmundaǵy trendterge – ınteraktıvti údeý, vıdeo-mazmun evolıýsııasy, beıimdelýi, monetızasııa taqyryptaryna arnalady. Olar medıany tutynýdyń jańa úlgileri ónimniń mazmunyn qalaı ózgertetini týraly, sandyq medıa monıtorıngi men saraptamasy jaıynda jáne «qazaqsha sóıleıtin Youtube» týraly bol­maq. Sondaı-aq is-sharalar bary­synda birneshe telearnanyń tele­vızııalyq jańa maýsymy ashylady.