Parlament Senatynyń Tóraǵasy Darıǵa Nazarbaeva Palestınanyń Qazaqstandaǵy elshisi Montaser Ábý Zeıdti qabyldady.
Dıplomat Parlamenttiń Joǵarǵy palatasynyń Tóraǵasy qyzmetine saılanýyna baılanysty Senat basshysyna Palestına Ulttyq keńesiniń quttyqtaýyn jetkizdi jáne oǵan aldaǵy ýaqyttaǵy qyzmeti tabysty bolýyna tilektestigin bildirdi.
«Qazaqstan táýelsizdiktiń alǵashqy kúninen bastap Taıaý Shyǵystaǵy ózekti máselelerdi beıbit jolmen sheshýdi jaqtap keledi jáne Palestınany áleýmettik-ekonomıkalyq turǵyda tezirek ońaltýǵa baǵyttalǵan halyqaralyq qoǵamdastyqtyń gýmanıtarlyq aksııalaryn qoldaıdy», dedi ol.
Elshi Qazaqstan tarapyna halyqaralyq kún tártibindegi negizgi máseleler boıynsha qoldaý kórsetip kele jatqany jáne ekijaqty yntymaqtastyq úshin alǵysyn bildirdi. M.Ábý Zeıd saýda-ekonomıkalyq yntymaqtastyqty damytý týraly aıta kelip, Qazaqstan men Ortalyq Azııadaǵy eń bıik ǵımarat bolatyn kóp salaly «Ábý-Dabı Plaza» kesheniniń qurylysy týraly habardar etti. Qazirge deıin 76 qabaty salyndy, qazan aıynyń sońynda «Sheraton» qonaqúıi paıdalanýǵa beriledi.
Taraptar ınvestısııalyq yntymaqtastyqty keńeıtý, Palestına azamattary úshin vıza tártibin jeńildetý múmkindikterin, sondaı-aq «Teńiz» munaı ken ornyndaǵy qaqtyǵysty talqylady. Máselelerdi pysyqtaý úshin mekemearalyq komıssııa quryldy. Senat Tóraǵasy sheteldik azamattardyń Qazaqstan zańnamasyn saqtaýy, sondaı-aq qazaq halqynyń ulttyq salt-dástúrlerin qurmetteýi qajettigin atap ótti.