Jasyratyny joq, qazirgi ýaqytta Allanyń qudireti sheksiz, shetsiz ekenine kúmánmen qaraıtyndar kóbeıip ketti. Abaı hákim aıtpaqshy, «Allanyń ózi de ras, sózi de ras». Keıingi kezderde aıaq astynan bolatyn tabıǵı apattardyń, adam nanǵysyz qubylystardyń túrli jaǵdaılarda qaıtalanyp turatyny kúpirliktiń kesirinen be dep te qalasyń. Kim biledi?
Bul suraqqa Qaqpaq aýylynyń turǵyny, 50 jyl aǵartý salasynda qyzmet etken zeınetker ustaz Núsip aqsaqal bylaı jaýap beredi. Naqtyraq aıtqanda, ol kisiniń úıinde tańǵalarlyq jaǵdaı oryn aldy. Bálkim sáıkestik shyǵar, bálkim qudaıdyń qudireti bolar... atamyzdyń kúrkedegi taýyǵy «ALLA» degen jazýy bar jumyrtqa shyǵarypty. Núsip qarııa sońǵy ýaqytta úı qusyn baǵyp júrgenin jáne densaýlyǵyna baılanysty kúnde jumyrtqa jeıtinin aıtty. Aýrý da, aýrýdyń emi de Alladan ekenin eskergen aqsaqal myna qubylystyń tekten tek emestigin aıtady. Syrty tegis keletin jumyrtqanyń mundaı erekshelikpen jaratylǵany jáne onda Allanyń belgisin bildirer jazýdy keskindegen syzyqtardyń baryna biz de kóz jetkizdik.
– Kezekti kúnderdiń birinde kúrkeden jumyrtqa jınap úıge kele jatqanda jumyrtqanyń syrtyndaǵy syzyqtarǵa kózim túse ketkeni... Tańyrqaı, zer salyp qarasam, arap qarpindegi «Alla» degen uǵymdy bildiretin jazý ekenine kózim jetti. О́zim tóte jazýdy óte jaqsy tanıtyn bolǵandyqtan, jumyrtqadaǵy jazýdyń joǵarydaǵydaı sóz ekenine kúmánim qalmady. Sosyn, tańǵajaıyp jańalyqty sizderge jetkizýge asyqtym, – deıdi Núsip qarııa.
Aldaǵy ýaqytta bul jumyrtqany meshitke aparyp bermek oıy bar. Qarııa shańyraǵynda bolǵan tańǵajaıyp qubylysty jaqsylyqqa balaıdy. D. JANASYL
Almaty oblysy,Raıymbek aýdany