Bıyl jyl basynan beri kórshi elderden tarıhı otanyna oralǵan 10,7 myńnan astam qandasymyz Qazaqstan azamattyǵyn aldy. Elimizdiń azamattyǵyn alǵan qazaqtardyń deni О́zbekstan elinen keldi. Olardyń úlesi – 48,5%. Odan keıingi orynda Qytaı Halyq Respýblıkasynan kóship kelgen etnostyq qazaqtar tur. Olar 36%-dy qurasa, Mońǵolııadan – 6,2%, Túrikmenstannan – 5,4%, Reseı Federasııasynan – 1,1%, Irannan – 0,5% etnostyq qazaqtar Qazaqstan azamattyǵyn aldy.
Atamekenine qonys aýdarǵan qazaqtar elimizdiń Aqmola (27%), Mańǵystaý (14%) jáne Jambyl (9%) oblystarynda, sondaı-aq Nur-Sultan (8,9%) jáne Shymkent (8,5%) qalalarynda qonystandy.
Búginge deıin, ıaǵnı 1991 jyldan bastap 307,3 myń otbasy nemese 1,046 mıllıon etnostyq qazaq tarıhı otanyna oralyp, oralman mártebesin alǵan eken.
«Qazaqstanda oralman mártebesin alǵan etnostyq qazaqtarǵa jeńildetilgen túrde azamattyq alý úshin qolaıly jaǵdaılar jasaldy. Bul mártebe bir jylǵa jaramdy. Mártebeni uzartý oralman mártebesi toqtatylǵan kúnnen bastap úsh aıdan aspaıtyn merzimge ótinish bergen kezde jeńildetilgen tártippen azamattyq alý úshin ǵana kózdeledi», deıdi Eńbek jáne halyqty áleýmettik qorǵaý vıse-mınıstri Ahmadı Sarbasov.
Vıse-mınıstr bul rette keıbir oralmandardyń usynylǵan ýaqyt ishinde jeńildetilgen tártippen Qazaqstan azamattyǵyn almaǵanyn jáne mundaı múmkindikten aıyrylǵanyn atap ótti.
«Osyǵan baılanysty Qazaqstannyń Tuńǵysh Prezıdenti – Elbasy Nursultan Nazarbaev mundaı sanattaǵy qandastarymyzǵa mártebesin jeńildetilgen tártippen alýdy 2019 jyldyń 31 jeltoqsanyna deıin uzartý týraly sheshim qabyldady. Osylaısha mártebesin uzartpaǵan oralmandar jergilikti atqarýshy organdarǵa júgine alady jáne Qazaqstan azamattyǵyn jeńildetilgen tártippen alý úshin ishki ister organdaryna qujattaryn tapsyra alady», dedi A.Sarbasov.
Aksııa aıasynda 26 tamyzdaǵy jaǵdaı boıynsha elimizde 5 789 etnostyq qazaqtarǵa oralman mártebesi uzartyldy, onyń 4 909-y Qazaqstan azamattyǵyn alýǵa qujat tapsyrdy.