Ádette respýblıkamyzda jeńil ónerkásip salasynyń, sonyń ishinde tigin óndirisiniń baýyryn jaza almaı júrgeni jóninde áńgimeler aıtylyp qalady. Muny joqqa shyǵarýǵa da bolmas. Degenmen el óńirlerinde bul turǵyda básekelestikke tótep bere alatyn, ári shyǵarǵan ónimderiniń sáni men sapasy bir-birine sáıkes keletin táp-táýir tigin kásiporyndary bar ekenin de aıtqanymyz jón.
Sonyń biri Aqtóbe qalasyndaǵy «Global arnaıy kıim óndiristik birlestigi» JShS desek, qatelese qoımaspyz. Tipti ony tutastaı elimizdegi batys óńirindegi jeńil ónerkásip salasyndaǵy kósh bastaýshy kásiporyn desek te, artyq aıtqandyq emes. Kompanııanyń basty baǵytyn óndiris pen turmystyq qyzmettiń barlyq salasy qyzmetkerlerine arnalǵan arnaýly kıimder óndirisi quraıdy. Sonymen birge munda azamattarǵa arnalǵan syrtqy kıimder men kúrtesheler jáne jyly oramaldar men tósek-oryn buıymdary da shyǵarylady. Sapaly ónim óndirýdiń basty bir tetigi zamanaýı tehnologııalarǵa baılanysty desek, bul jóninen de «Globaldyń» bási bıik tur. Osy arqyly jylyna 250 myńnan astam sapaly jáne ekologııalyq turǵydan taza arnaıy jáne azamattyq sıpattaǵy kıimder saýda oryndaryna jóneltiledi. Sońǵy úlgidegi jabdyqtarǵa qosa jeńil ónerkásip jańashyldarynyń sapasy joǵary, tózimdi matalar men aksessýarlardy jáne ızolıasııalyq ónimderdi qoldanýy da tutynýshylardyń talǵamynan shyǵýda.
«Global» kompanııalar tobynyń jetekshisi Nadejda Shabaevanyń aıtýynsha birlestiktiń barlyq ónimderi «Sapa menedjementi júıesi» sertıfıkattarynyń standarttaryna sáıkes keledi. Jeńil ónekásip kásiporny dúkeniniń sóresine kóz salǵan tutynýshylar mundaǵy otandyq ónimderdiń baǵasy qymbat emes, kez-kelgen otbasy úshin qoljetimdi ekenin kórer edi. Mysaly er azamattarǵa arnalǵan 54 ólshemdegi jyly kúrtesheniń baǵasy nebári 18 500 tenge turatyny aldyńǵy pikirimizdiń aıǵaǵy.
Taǵy bir súısinerlik jáıt qazirgi kúni birlestikte óndiris ólshemin ósirý úshin jańa óndiristik tigin kesheni qurylysynyń júrgizilip jatqany. Oǵan 1 mıllıard 200 mıllıon tenge jeke ınvestısııalyq qarajat tartylǵan. Qosymsha keshen iske qosylǵan kezde jańadan 500 jumys orny qurylmaq. Onyń qýaty jylyna 900 myń tigin buıymdaryn shyǵarýǵa laıyqtalǵan. Sol kezde kásiporyn jylyna 250 mıllıon tenge salyq túsimderin túsirýge múmkindik alady eken.
Búgingi kúni kásiporynda 200 den astam adam jumyspen qamtylǵan. Onyń 30 paıyzyn múmkindigi shekteýli jandar men turmysy tómen otbasylardy tárbıelengen qyz-kelinshekter quraıdy. Birlestikte joǵaryda aıtylǵandaı jańa jumys oryndaryn qurý men qatar kásibı mamandyqta aldyn-ala ázirleý baǵdarlamalary da qarastyrylǵan.
Aıtalyq birlestik bazasynda ótken 2018 jyldyń naýryz aıynda «Atameken» ulttyq kásipkerlik tpalatasynyń qoldaý kórsetýimen oqý-óndiristik keshen qurylǵan. Bul qadam turǵyndardy nátıjeli jumyspen qamtý jáne jappaı kásipkerlikti damtyý jónindegi «Eńbek» memlekettik baǵdarlamasyn júzege asyrý úshin jasalǵan eken. Sóıtip, osy arqyly 7 topta 194 tiginshi-mamandar ázirlenipti. Atalǵan túlekterdiń 80 paıyzy «Global arnaıy kıim óndiris birlestigine» ornalastyrylǵan. Olardyń qatarynda jumyssyz júrgen kóp balaly analar men múmkindigi shekteýli jandar da jetkilikti. Olar kásiporyn janyndaǵy oqý-óndiristik keshenge aýdandyq jáne qalalyq jumyspen qamtý ortalyqtarynyń joldamasymen kelgen edi, -deıdi kompanııalar tobynyń jetekshisi N.Shabaeva.
Sóz sońynda elimizde «Global» sekildi arnaıy jáne syrtqy azamattyq kıimder tigýge mamandanǵan kásiporyndar kóbeıgen saıyn, jeńil ónerkásiptiń júgi de soǵurlym salmaqty bola túser edi demekpiz
AQTО́BE