Qazaqstan Syrtqy ister mınıstriniń orynbasary Roman Vasılenkonyń 30 qyrkúıek pen 1 qazanda Parıjde ótken kelissózderiniń nátıjeleri qos taraptyń qazaq-fransýz strategııalyq seriktestigin odan ári nyǵaıtýǵa degen ózara múddeliligin kórsetti. Bul týraly Qazaqstan Respýblıkasynyń Syrty ister mınıstrliginiń baspasóz qyzmeti habarlaıdy.
Fransııanyń Eýropalyq jáne syrtqy ister mınıstrliginiń Memlekettik hatshysy, Ekonomıkalyq yntymaqtastyq boıynsha qazaq-fransýz úkimetaralyq komıssııasynyń Teń tóraǵasy Jan-Batıst Lemýanmen kezdesýde taraptar ekijaqty formatta jáne kópjaqty alańdardaǵy ózara yqpaldastyq máselelerin keńinen talqylady.
Fransııanyń burynǵy prezıdenti Jak Shıraktyń qaıtys bolýyna baılanysty resmı aza tutý rásimderine qatysqan R.Vasılenko Prezıdent Qasym-Jomart Toqaevtyń kóńil aıtýyn jetkizip, kórnekti saıasatkerdiń halyqaralyq qatynastar tarıhyndaǵy erekshe ornyn jáne onyń qazaq-fransýz qatynastarynyń damýyna qosqan aıtarlyqtaı úlesin atap ótti.
Kelissózder barysynda barlyq mańyzdy baǵyttar boıynsha ekijaqty strategııalyq seriktestikti odan ári tereńdetý máselelerine asa den qoıyldy. Sonymen qatar Fransııa Prezıdenti Emmanıýel Makronnyń aldaǵy ýaqytta Qazaqstanǵa josparlanǵan saparyna daıyndyq aıasynda yntymaqtastyqqa jańa serpin beretin basymdyqqa ıe jobalardy iske asyrý barysy qarastyryldy.
R.Vasılenko qazaqstandyq taraptyń ózara is-qımyl spektrin keńeıtýge, onyń ishinde sıfrlandyrý, aýyl sharýashylyǵy, balamaly energetıka sııaqty jańa salalardy arttyrýǵa baǵyttalǵanyn rastady. Osy baǵyttaǵy jumystyń sońǵy ýaqyttaǵy pozıtıvti mysaldary retinde Fransııanyń aımaqtarynda bıyl Qazaqstan Elshiligi uıymdastyrǵan sharalar atap ótildi: naýryz aıynda Kanndaǵy sıfrlandyrý jáne balamaly energetıka boıynsha forým, qyrkúıektegi Renn qalasyndaǵy aýylsharýashylyq jáne agroónerkásip forýmy boldy, sondaı-aq 8 qazanda Parıjde Qazaqstan Respýblıkasy Premer-Mınıstriniń orynbasary Roman Sklıardyń qatysýymen ótetin ınvestısııalyq forýmy. Is-sharalar fransýz isker toptary arasynda úlken qyzyǵýshylyq týdyrdy jáne iskerlik baılanystar ornatýdyń tamasha alańyna aınaldy.
Nur-Sultan men Parıj bilim salasyndaǵy yntymaqtastyqty keńeıtýge úlken mán berýde. 1993 jyldan bastap Tuńǵysh Prezıdent - Elbasy Nursultan Nazarbaevtyń «Bolashaq» stıpendııalyq baǵdarlamasy jumys isteıdi. 2014 jyldyń jeltoqsan aıynan bastap bizdiń elimizde «Sorbonna-Qazaqstan» ınstıtýty óz jumysyn atqaryp keledi. О́tken jyldan bastap magıstranttar men aspıranttardyń «Abaı-Vern» qazaq-fransýz stıpendııasynyń qurylýyna baılanysty elderimizdiń akademııalyq utqyrlyǵy artty.