Kıber shabýyldardy zertteý jáne taldaý ortalyǵynyń (SARKA) ókilderi bilim berý granttaryn bólý rásimin tekserip, óz qorytyndysyn shyǵardy. Bul týraly Bilim jáne ǵylym mınıstrliginiń baspasóz qyzmeti habarlady.
«Qazaqstan Respýblıkasy Bilim jáne ǵylym mınıstrliginiń «Ulttyq testileý ortalyǵy» bakalavrıat jáne magıstratýra boıynsha bilim berý granttaryn bólýge jaýap beretin aqparattyq júıeniń bastapqy kodtaryn SARKA mamandaryna tekserýge bergen bolatyn. Tekserý nátıjeleri boıynsha, granttardy bólý úrdisine bóten adam aralasa almaıtyndyǵy anyqtaldy. Atalǵan tekserý granttardy bólýdiń jarııalanǵan nátıjeleri baǵdarlama bergen derektermen tolyq sáıkes keletinin kórsetti. Osylaısha, granttardy bólý týraly derekter tizimder jasalǵan sátten bastap nátıjeler jarııalanǵan sátke deıin óz tutastyǵy men qupııalylyǵyn saqtap qalǵan dep senimmen aıtýǵa bolady», delingen habarlamada.
SARKA mamandary tizimderdi qalyptastyrýǵa jaýap beretin aqparattyq júıege bógde adamdar aralaspaǵan degen qorytyndyǵa keldi. Aıta ketken jón, atalǵan tekserý jumystary barysynda 76 009 qatysýshy arasynda 58 126 grantty taǵaıyndaý úrdisi tekserilgen.