Aǵymdaǵy jylǵy 9 aıda múgedektigi bar 521 myńnan astam adam shamamen 235 mlrd teńge somasynda áleýmettik tólemder, tehnıkalyq kómekshi quraldar men arnaıy áleýmettik qyzmetter aldy. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
Qazirgi ýaqytta Qazaqstanda múgedektigi bar 690 myń adam turady, onyń ishinde eńbekke qabiletti jasta 424 myń adam, zeınetkerlik jasta 177 myń adam, 18 jasqa deıingi balalar sany – 89 myń adam.
2019 jylǵy 9 aıda múgedektigi boıynsha memlekettik áleýmettik járdemaqy tóleýge 198,1 mlrd teńge baǵyttaldy. Aǵymdaǵy jyldyń 1 qazanyndaǵy jaǵdaı boıynsha alýshylar sany 521 myń 153 adamdy qurady, járdemaqynyń ortasha mólsheri – 42 496 teńge. Aǵymdaǵy jyly bul maqsatqa 265,3 mlrd teńge qarastyrylǵan.
Eńbekmın Áleýmettik qyzmetter departamentiniń dırektory Artem Ábildınovtyń aıtýynsha, múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý boıynsha jumys Eńbek jáne halyqty áleýmettik qorǵaý mınıstrliginiń mańyzdy basymdyǵy.
«Aǵymdaǵy jylǵy 1 shildeden bastap múgedek balalardy jáne 18 jastan asqan bala kezinen birinshi toptaǵy múgetektigi bar adamdardy kútý boıynsha memlekettik járdemaqy kólemi artty. Onyń mólsheri 41 578 teńgeni quraıdy. Búgingi kúni járdemaqynyń birinshi túrin 27 mlrd teńge somasyna 84,7 myń adam, ekinshi túrin – 4,3 mlrd teńge somasyna 13,5 myń adam aldy», dedi Ábildınov.
Jumys berýshiler tarapynan áleýmettik aýdarymdar júzege asyrylǵan QR azamattary eńbekke qabiletin joǵaltqan kezde da Memlekettik áleýmettik saqtandyrý qorynan tólemder alatynyn aıta ketý kerek. 2019 jylǵy 9 aıdyń qorytyndysy boıynsha MÁSQ-dan 84 myń 139 adam 10,2 mlrd teńge somasynda járdemaqy aldy.
Múmkindikteri shekteýli adamdardyń áleýmettený deńgeıin arttyrý maqsatynda olar tehnıkalyq kómekshi (ornyn toltyrýshy) quraldarmen jáne ońaltý qyzmetterimen qamtamasyz etiledi. 2019 jyly bul maqsattarǵa 125 myń 530 múgedektigi bar adam úshin 7,5 mlrd teńge qarajat qarastyrylǵan. Jyl basynan beri osy baǵyt boıynsha 4,8 mlrd teńge ıgerildi.
Múgedektigi bar adamdardy áleýmettik qamsyzdandyrý júıesiniń bir baǵyty – jartylaı stasıonar jáne úı jaǵdaıynda arnaýly áleýmettik qyzmetter kórsetý. 2019 jyly osy maqsattarǵa respýblıkalyq bıýdjetten 1,2 mlrd teńge qarajat qarastyrylǵan. Búgingi tańda mundaı qyzmetter jalpy somasy 688 mln teńge kóleminde 4 myńnan astam azamatqa kórsetildi.
Qazaqstan Respýblıkasynyń 2030 jylǵa deıingi áleýmettik damý tujyrymdamasynda 2025 jylǵa qaraı Qazaqstanda áleýmettik qyzmetter men áleýmettik kómek kórsetýdiń ıntegrasııalanǵan modelin qurý kózdelgen.
Artem Ábildınovtyń aıtýynsha, bul model áleýmettik qolaısyzdyqtyń aldyn alýǵa baǵyttalǵan.
«Bilim berý, densaýlyq saqtaý, áleýmettik qorǵaý jáne basqa da salalardyń áleýmettik qyzmetkerleriniń qyzmetin úılestirý tetigi ázirlenedi, bul muqtaj azamattarǵa «jalǵyz tereze» qaǵıdaty boıynsha áleýmettik qyzmet kórsetýge múmkindik beredi», dep atap ótti Ábildınov.
Sonymen qatar ol qazirgi ýaqytta ıntegrasııalanǵan modeldi engizý boıynsha pılottyq joba elimizdiń 10 óńirinde (Aqmola, Almaty, Batys Qazaqstan, Jambyl, Qaraǵandy, Qyzylorda, Qostanaı, Pavlodar oblystary, Almaty, Nur-Sultan qalalary) iske asyrylyp jatqanyn aıtty.
Esterińizge sala keteıik, qazannyń ekinshi jeksenbisi Qazaqstanda múgedektigi bar adamdar kúni bolyp belgilengen.