О́tken aptada fýtboldan Eýropa lıgasynyń 3-týr oıyndary ótti. «L» tobynda synǵa túsip jatqan elordanyń «Astana» komandasy Nıderlandqa qonaqqa baryp, jergilikti «AZ Alkmar» komandasynan iri eseppen jeńilip qaldy.
Bul joly komanda Nıderlandqa jaraqatyna baılanysty negizgi quramdaǵy birneshe fýtbolshyny aparǵan joq. Atap aıtar bolsaq, «Astananyń» «motory» sanalatyn horvatııalyq jartylaı qorǵaýshy Marın Tomasov, qazaqstandyq komandany alǵa súıreıdi dep sengen kongolyq shabýylshy Fırmın Mýbele, ıslandııalyq jartylaı qorǵaýshy Rýnar Sıgýronsson jáne chernogorııalyq qorǵaýshy Jarko Tomashevıch.
Nıderlandtyń Gaaga qalasyndaǵy «Kars Djıns» stadıonynda ótken oıynda bas bapker Roman Grıgorchýk jasyl alańǵa birinshi mınýttan bastap fýtbol oınamaǵanyna bir apta bylaı tursyn, birneshe aıdyń júzi bolǵan fýtbolshylarǵa senim artty. Jumsaqtap aıtqanda, alańǵa ekinshi quram oıynshylaryn shyǵardy. Bul kezdesýde el chempıonatyndaǵy 30 týrda alańǵa nebári 5 ret shyqqan shabýylshy Dıdar Jalmuqan Eýrododa oıyndarynda alǵashqy kezdesýin ótkizdi. Bes oıynda 164 mınýt oınaǵan Jalmuqan AZ komandasyna qarsy tolyq bir match ótkizdi. Oıyn tájirıbesi joq fýtbolshy halyqaralyq deńgeıdegi Eýropa lıgasynda qalaı jasyndaı jarqyldamaq? Al Eýrododa oıyndarynda sońǵy ret shilde aıynda shyǵyp, onda da 9 mınýt oınaǵan, el chempıonatyndaǵy sońǵy oıynyn 19 qyrkúıekte ótkizgen Serikjan Mujyqovtan kim qandaı shedevr kútti? Sonymen qatar bir oıyn oınap, eki match demalatyn shabýylshy Iýrıı Persýh pen qorǵaýshy Abzal Beısebekov, 100 múmkindiktiń tek bireýinde ǵana gol soǵatyn shabýylshy Rangelo Iаnga «Astanany» qalaısha órge súıresin? Osyndaı qurammen alańǵa shyqqan fýtbolshylardyń jeńiletini anyq edi. Sondyqtan bul jeńiliske asa qatty tańǵalýdyń reti joq sııaqty.
Birinshi taımnyń ózinde «Astana» májbúrli túrde eki oıynshysyn almastyrǵany da oıynǵa keri áserin tıgizbeı qoımady. Match bastala salysymen oıyn tizginin óz qoldaryna alǵan alań ıeleriniń birqatar qaýipti shabýylyn birde qorǵaýshylar, birde qyraǵy qaqpashy Erıch qaıtaryp jatty. Kezdesýdiń 26-mınýtynda Erıch jaraqat alyp, ornyna Aleksandr Mokın shyqqannan keıin onsyz da oıyny júrmeı jatqan jerlesterimiz odan beter tyǵyryqqa tireldi. Urymtal sátti múlt jibermeıtin «AZ Alkmar» komandasynyń fýtbolshylary 39-mınýtta penaltıden gol soǵyp ketti. 11 metrlik aıyp dobyn 21 jastaǵy Tıon Kopmeıners sátti oryndady. Arada 4 mınýt ótkende 18 jastaǵy Maıron Boadý qaqpamyzǵa ekinshi golyn soǵyp ketti.
Ekinshi taımda bas bapkerden aqyl-keńes tyńdaǵan bizdiń jigitter oıynda betburys jasaıtyn shyǵar dep úmittengen edik. Biraq «Astana» oıynshylary biz kútkennen de nashar oıyn kórsetti. Matchtyń 77-mınýtynan bastap alań ıeleri tarapynan goldardyń tıegi aǵytyldy. AZ fýtbolshylary aınaldyrǵan 15 mınýttyń ishinde qaqpamyzǵa tórt gol soqty. Ten Kopmeıners ekinshi ret penaltıden gol soqsa, 20 jastaǵy Kelvın Stengs, 19 jastaǵy japonııalyq Iýkınarı Sýgavara jáne 23 jastaǵy Ýssama Idrıssı bir-bir goldyń avtory atandy. Gol soqqan oıynshylardyń esiminiń aldyna jas mólsherin bekerge jazǵan joqpyz. «Astana» qaqpasyna qaı jastaǵy fýtbolshylardyń gol soqqanyn bile otyryńyzdar.
Sóz sońynda mynadaı qyzyqty derekti bólise ketken jón shyǵar. 2017 jyly «Seltıkke» qarsy ótken matchta «Astana» qaqpasyn qorǵaǵan Aleksandr Mokın sol oıynda qaqpasyna 5 gol jiberip alǵannan keıin keshe 2 jyldyq úzilisten soń Eýrokýbok oıyndaryna alańǵa alǵash ret shyqqan edi. Qyrsyq bir aınaldyrǵanda shyr aınaldyrady degendeı, bul jolǵy matchta Mokın qaqpasyna 6 gol ótkizip, antırekord ornatty.