Almaty oblysynda elimizdiń jańa Konstıtýsııa jobasyn talqylaýǵa arnalǵan oblys aktıviniń otyrysy ótti. О́ńir aktıvi jańa Ata zań qabyldanǵan jaǵdaıda bıliktiń halyq aldyndaǵy jaýapkershiligi kúsheıip, eldiń saıası júıesi tolyq jańaratynyn atap ótti, dep jazady Egemen.kz.
«Konstıtýsııalyq reforma aıasyndaǵy ózgerister qoǵam men zaman talabyna saı saıası júıeni jańartýǵa baǵyttalǵan: memlekettik basqarý ashyq bola túsedi, sheshim qabyldaý sapasy artady, azamattardyń memleketke degen senimi nyǵaıady. Sonymen qatar ádilettilik, zań ústemdigi, birlik pen kelisim, egemendik pen aýmaqtyq tutastyq, tabıǵatqa jaýapkershilikpen qaraý qaǵıdattary konstıtýsııalyq deńgeıde bekitiledi. Eń bastysy – bul ózgeristerdi halyqtyń ózi qabyldaıdy. Konstıtýsııanyń jańa redaksııasy jalpyhalyqtyq referendým arqyly bekitilip, árbir azamatqa sanaly tańdaý jasaýǵa múmkindik beriledi», dedi oblys ákimi Marat Sultanǵazıev.
Jańa joba aıasyndaǵy negizgi jańalyqtardyń biri – 145 depýtattan turatyn bir palataly Parlament, ıaǵnı Quryltaı ınstıtýtyn engizý. Sondaı-aq memlekettik basqarý júıesine vıse-prezıdent ınstıtýtyn engizý usynylyp otyr.Taraptar Konstıtýsııalyq reforma aıasynda usynylǵan ózgeristerdi halyqpen kezdesýlerde jáne qoǵamdyq alańdarda qarapaıym ári túsinikti tilmen jetkizýdiń mańyzdylyǵyna nazar aýdardy. Sonymen qatar oblys ákimi Konstıtýsııalyq reforma jónindegi komıssııa quramyna Almaty oblysynan oblystyq máslıhat tóraǵasy Qýat Baıǵojaev múshe ekenin erekshe atap ótti.
Qazaqstannyń saıası partııalary Jańa Konstıtýsııanyń jobasyn talqylady
Aıta keteıik, oblys ákimi Marat Sultanǵazıev tóraǵalyq etken jıynǵa oblystyq máslıhat tóraǵasy, oblys ákiminiń orynbasarlary, aýdan jáne qala ákimderi, departamentter men basqarmalardyń basshylary, quqyq qorǵaý organdarynyń ókilderi, iri kásiporyn jetekshileri men jergilikti buqaralyq aqparat quraldarynyń ókilderi qatysty.
Oljas Bektenov: Konstıtýsııa jobasy – Ádiletti Qazaqstan men tehnologııalyq serpilistiń berik negizi