Eki kún qatarynan ótken festıval aıasynda Reseı men Ýkraınadan kelgen jas juldyzdar Petr Chaıkovskııdiń «Aqqýlar kóli» spektaklin qoıdy. Shara «Jastar jyly» aıasynda uıymdastyryldy, dep habarlady Almaty qalasy ákimdiginiń baspasóz bólimi.
Festıval "Jastar jylyna" jáne ataqty pedagog Ulan Mırseıdovtyń qurmetine arnaldy.
Ustaz sanaly ǵumyrynda 40-tan astam balet ártisterin daıyndap, álemdik deńgeıge shyǵarǵan. Spektalklden túsken qarajat jas mamandardy qoldaýǵa jumsalmaq. Oǵan qosa, ár festıal saıyn bir adamǵa grant tabystaý kózdelip otyr. Sertıfıkat jas ártistiń shetelge baıqaýǵa qatysýǵa ketetin shyǵynyn óteıdi.
«Eńbegi kózge kórinbeıtin jandar bul – pedagogtar. Juldyzdar sahnaǵa jarqyrap shyǵady, olarǵa qashanda kórermender qyzyǵa qaraıdy. Degenmen, ár ártistiń artynda ustazdyń eńbegi bar. Ol soǵan bar ǵumyryn arnaıdy. Búgingi festıval sondaı pedagogqa arnalyp otyr. Ol kisiniń shákirtteri arttynan erip kele jatqan jas býyndy qoldaýdy qup kóripti. Igi bastama der edim», - dedi Abaı atyndaǵy Qazaq Memlekettik Akademııalyq opera jáne balet teatrynyń bas baletmesteri Gúljan Tutqybaeva.
Aıta keteıik, festıval aıasynda Almatyda 24 qarasha kúni «Uıqydaǵy arý», al jeltoqsannyń 20-sy men 22-si Jańa jyl qarsańynda «Shelkýnchık» cpektakli qoıylady. Bul qoıylymdarǵa AQSh-tan óner maıtalmandary qatysady dep kútilip otyr.