Qoǵam dertimen birlesip kúreskende ǵana utamyz. Sońǵy jyldary sybaılas jemqorlyq deregi týraly resmı organǵa habar bergenderdi kótermeleý sharalary qoldanylyp keledi. Mysaly, Atyraý oblysynda 30 adam keleńsiz kóriniske kýá bolyp, únsiz qalmaı, tıisti qyzmetti qulaqtandyrǵandary úshin jalpy somasy 4,5 mln teńge kóleminde syıaqy alǵan. Bul azamattyq qoǵamnyń belsendiligin ańǵartsa, medaldyń ekinshi beti bary sekildi, sybaılas jemqorlyq quqyq buzýshylyq derekteriniń de kóbeıgenin kórsetedi.
Zań júzinde qansha qatal sharalar qoldanylyp jatsa da, jeń ushynan jalǵasqan sybaılas jemqorlyq áreketterine tolyq tosqaýyl bolar emes. Atyraýdaǵy sybaılas jemqorlyqqa qarsy qyzmet jyl basynan beri 116 qylmystyq quqyq buzýshylyqty anyqtady. Ásirese memleket qarjysyn talan-tarajǵa salý, para alý sekildi keleńsiz jaıttar jıi oryn alyp otyr.
–Bıyldyń ózinde 44 adam qylmystyq jaýapkershilikke tartyldy, – deıdi Sybaılas jemqorlyqqa qarsy is-qımyl agenttiginiń oblystaǵy departamentiniń basshysy Nyǵmedjan Saparov. – Tirkelgen qylmystardyń 55-i bilim salasyna, 15-i aýyl sharýashylyǵyna, 11-i mádenıet, sport, 6-ýy áleýmettik qamsyzdandyrý, 16-sy kásipkerlikti qorǵaý salasyna tıesili. Memlekettik baǵdarlamalardaǵy qarajatty jymqyrý derekteri boıynsha 36 qylmys anyqtaldy. Sondaı-aq jergilikti ákimdikte 85 sybaılas jemqorlyq qylmysy áshkerelense, memlekettik satyp alý zańnamasyn buzǵan 44 derek belgili boldy. Osylardyń barlyǵynyń kesirinen memleketke 273,4 mln teńge zalal keltirilip, sonyń 99%-y keri óndirildi.
Bıyl «Transparensy International Kazakhstan» uıymy elimizdegi sybaılas jemqorlyq deńgeıiniń taralýyna, osy keselge beıim salalar men memlekettik organdar jóninde arnaıy zertteý jumysyn júrgizgen. Áleýmettik saýalnama qortyndysy, ásirese densaýlyq saqtaý salasynda, polısııa organdarynyń qyzmeti men jer qatynastary salasyndaǵy sybaılas jemqorlyq táýekeliniń joǵary ekenin kórsetken. «Osy táýekelderdi joıý maqsatynda Agenttiktiń Atyraý oblysy boıynsha departamentimen «Atyraý – adaldyq alańy» jobalyq keńsesiniń, «Adal jol», «Sapaly jol», «Sanaly urpaq», «Ashyq bıýdjetterdiń ınteraktıvti kartasy», «Bıznesti sybaılas jemqorlyqqa qarsy súıemeldeý» jobalarynyń qyzmetin úılestirý jumystary júıeli júrgizilip otyr», – deıdi Nyǵmetjan Saparov. Mysal aıtar bolsaq, shilde, tamyz, qyrkúıek aılarynda «Adal jol» jobasynyń jumysshy tobymen temir jol salasyndaǵy sybaılas jemqorlyq kórinisterin joıý maqsatynda «Atyraý-Almaty», «Manǵyshlaq-Atyraý», «Atyraý-Aqtóbe», «Atyraý-Nur-Sultan» jáne «Tashkent-Ýrgench-Saratov» baǵyttaryndaǵy poıyzdarǵa 12 ret reıdtik is-shara uıymdastyrylǵan. Nátıjesinde, bıletsiz poıyzǵa mingen 5 jolaýshy, 50 kg zańsyz tasymaldanǵan júk, 2 tehnıkalyq kemshilik anyqtalyp, 5 jolserikke qatysty ákimshilik hattama toltyryldy.
«Bıznesti sybaılas jemqorlyqqa qarsy súıemeldeý» jobasy aıasynda «KAZAKH INVEST» AQ Atyraý fılıalymen, Atyraý oblystyq kásipkerlik palatasymen birlesken jumystardyń nátıjesinde kásipkerlerdiń 171 mlrd 109 mln 900 myń teńgeniń 13 ınvestısııalyq jobalary qorǵaýǵa alyndy. Kásipkerlerden túsken 17 ótinishtiń 15-i qanaǵattandyryldy. Kásipkerlerge kóp jaǵdaıda jer telimderin alý, keńeıtý, sýbsıdııa alý jumystary kezinde qıyndyqtar týyndaıtyny anyqtaldy. «Iаǵnı, kórsetilgen jaǵdaı «Transparensy International Kazakhstan» uıymynyń zertteýinde jazylǵan jer qatynastary salasyndaǵy sybaılas jemqorlyqtyń deńgeıi boıynsha málimettermen sáıkes keledi», deıdi departament basshysy.
Sońǵy kezderi Atyraýdaǵy densaýlyq saqtaý salasy jıi synǵa iligip ketti. Kadr jetispeýshiligi, medısınalyq qyzmet kórsetýdiń tómendigi, azamattardyń qyzmet kórsetý sapasyna kóńilderi tolmaýy bul salaǵa qoıylatyn synnyń júgin aýyrlatyp otyr. «Atyraý – adaldyq alańy» jobalyq keńsesiniń qyzmetkerlerimen júrgizilgen monıtorıngtik jumystar barysynda da olqylyqtar anyqtalǵan. Aıtalyq «Atyraý– adaldyq alańy» jobalyq keńsesi qyzmetkerleri oblystyq sybaılas jemqorlyqqa qarsy qyzmet departamentiniń janynan qurylǵan Arnaıy monıtorıngtik toptyń múshelerimen birlesip, tamyz aıynda oblystyq densaýlyq saqtaý basqarmasyna qarasty oblystyq balalar aýrýhanasynda monıtorıngtik jumystar júrgizdi. Sol kezde aýrýhana qyzmetkerleriniń zeınetaqy jarnalary zeınetaqy qorlaryna tolyq jáne ýaqytyly túspeıtini belgili bolǵan. Atalǵan departament óz kezeginde anyqtalǵan kemshilikter boıynsha shara alý jóninde ýákiletti organdarǵa usynys joldap, nátıjesinde «Atyraý oblystyq balalar aýrýhanasy» sharýashylyq júrgizý quqyǵyndaǵy kommýnaldyq memlekettik kásipornyna aıyppul túrinde 2 500 003 teńge aıyppul salynyp, qyzmetkerlerdiń zeınetaqylary tolyǵymen aýdaryldy.
Sybaılas jemqorlyqqa qarsy kúreske baǵyttalǵan jumystar munymen shektelmeıdi. Jańa jobalar men tyń bastamalar qoǵamnyń keleńsiz kórinisiniń aldyn alýdy maqsat etip otyr.
ATYRAÝ