Mektepti aralaý barysynda Nur-Sultan qalasynyń ákimi Altaı Kólginov Prezıdentke astanany damytý jónindegi keńeste berilgen tapsyrmalardyń oryndalýy týraly baıandady. Onyń aıtýynsha, bıyl 5 myń oryndyq 6 jańa mektep, al 2020 jyly 10 myń oryndyq 12 mektep paıdalanýǵa beriledi. Bul týraly Aqordanyń baspasóz qyzmeti habarlady.
Memleket basshysyna Elorda halqynyń 25 paıyzy turatyn qala aýmaǵyndaǵy 16 turǵyn úı alabyn damytý jónindegi tapsyrmalarynyń júzege asyrylý jaıynda da málimet berildi. Sondaı-aq Altaı Kólginov qazirgi ýaqytta qalada úsh aýysymdy 8 mektep baryn, osy máseleni sheshý úshin jyl saıyn 12 mektep salý qajettigin aıtty.
Sonymen qatar ákim Prezıdenttiń tapsyrmasy boıynsha buqaralyq sportty damytý maqsatynda 4 jańa sport nysanynyń qurylysy bastalǵanyn habarlady.
Memleket basshysy №23 mekteptiń materıaldyq-tehnıkalyq bazasymen tanysyp, oqý kabınetterin aralady, oqýshylarmen jáne muǵalimdermen áńgimelesti. Muǵalimder Prezıdentke mekteptiń qajettilikteri týraly aıtty.
Qasym-Jomart Toqaev mekteptiń túıtkildi máselelerimen tanys ekenin, atalǵan aýdanda qysqa merzim ishinde jańa mektep salý jóninde tapsyrma bergenin atap ótti.
–Bul – iske asatyn jospar. Sizderge aldaǵy ýaqytta jańa mektepte jumys isteýge múmkindik bolady, – dedi Memleket basshysy.