Qasym-Jomart Toqaev kásibı tigin jabdyqtaryn qurastyrýmen ári jetkizýmen aınalysatyn, arnaıy kıimder men basqa da turmystyq jáne tehnıkalyq buıymdar shyǵaratyn mekemeniń jumysymen tanysty. Bul týraly Aqordanyń baspasóz qyzmeti habarlady.
Prezıdent shyǵarylatyn ónimderdiń sapasy men suranysqa ıe bolýyn oń baǵalap, kompanııanyń eksporttyq áleýetine nazar aýdardy.
Qasym-Jomart Toqaev mekeme qyzmetkerlerimen áńgimelesý barysynda olardyń eńbeginiń elimiz úshin mańyzdy ekenin aıtty. Sondaı-aq ol memlekettiń halyqtyń áleýmettik álsiz toptaryna qoldaý kórsetetinin jáne osyndaı jandar úshin jumys oryndaryn ashatyn mekemelerge árqashan kómek beretinin atap ótti.
–Sizderdiń fabrıkalaryńyzdy úlken qyzyǵýshylyqpen aralap shyqtym. Shyn máninde, bul qajetti ári ozyq ónim shyǵaratyn jáne jaqsy jabdyqtalǵan áleýmettik-jaýapty kásiporyn. Eń bastysy, munda sizder sııaqty ismer adamdar jumys isteıdi, – dedi Qasym-Jomart Toqaev.
Mekeme qyzmetkerleri fabrıkaǵa kelgeni úshin Memleket basshysyna alǵys aıtyp, onyń memlekettik qyzmetine tabys tiledi. Jalpy mekemede 460 adam jumys isteıdi, sonyń ishinde 45-i halyqtyń áleýmettik álsiz tobyna jatady.