Qazaqstan Qorǵanys mınıstrliginiń áskerı medısınalyq ortalyǵy búgin mereıtoıyn atap ótti. Osyǵan baılanysty merekelik shara uıymdastyrylyp, onda áskerı medısınanyń damýyna ólsheýsiz úles qosqan mamandar men ortalyqtyń jetistikteri aıtyldy. Bul týraly mınıstrliktiń baspasóz qyzmeti habarlady.
Ortalyqta óz isiniń sheberi, bilikti áskerı dárigerler men ǵalymdar jumys isteıdi. Búgingi tańda bul jerde 50 qyzmetker, 11 sarapshy, 9 oqytýshy men joǵary sanatty 6 dáriger qyzmet etýde. Eki qyzmetker medısına ǵylymynyń kandıdaty ǵalym dárejesin ıelense, bir PhD dáriger bar.
Ortalyq Azııada teńdesi joq áskerı medısına ortalyǵynyń tarıhy 1969 jyldyń 1 qarashasynda Almaty qalasynda Ortaazııalyq áskerı okrýginiń okrýgtik sot-medısınalyq zerthanasy qurylǵanda bastaldy. Qazaqstan táýelsizdik alǵannan keıin ony QR QM Ortalyq medısınalyq zerthanasy dep atady. Al 2010 jyly mekeme óziniń qazirgi ataýyn aldy.
Mekeme áskerı medısına salasynda qosymsha bilim berýdi qamtamasyz etedi, biliktilikti arttyrý jáne kýrstyq daıarlaý salasyndaǵy uıymdastyrý jáne oqý-ádistemelik jumystarǵa jaýap beredi, Qarýly Kúshterdiń medısınalyq quramyna áskerı-medısınalyq daıarlyqta, sot-medısınalyq, patologoanatomııalyq, hımııalyq-toksıkologııalyq jáne gıstologııalyq zertteýler júrgizýde ádistemelik jáne praktıkalyq kómek kórsetedi. 2011 jyldan bastap onyń quramyna Qazaqstan Qarýly Kúshteri medısınasy quramyndaǵy ınternatýra qosyldy.
Budan basqa, ortalyq IID, Ulttyq ulan jáne QR UQK Shekara qyzmetiniń áskerı qyzmetshilerine medesınalyq kómek kórsetýdi úıretedi.