Bul týraly Ishki ister mınıstrliginiń baspasóz qyzmeti habarlady.
Jyl basynan bergi 9 aı aralyǵynda mas júrgizýshiler tarapynan 342 jol-kólik oqıǵasy oryn alǵan. Saldarynan 64 adam qaza taýyp, 493 adam jaraqat alǵan.
Qazaqstan Respýblıkasynyń Prezıdenti Qasym-Jomart Toqaev elimizdiń joldaryndaǵy jaǵdaıdyń alańdaýshylyq týdyratynyn atap ótken edi jáne mas kúıde avtokólik júrgizgeni úshin jazany qatańdatý qajettiligine erekshe nazar aýdardy. Memleket basshysynyń tapsyrmasyna sáıkes Ishki ister mınıstrligi osyndaı quqyq buzýshylyqtar úshin qylmystyq jáne ákimshilik jaýapkershilikti kúsheıtý jóninde usynystarmen bastama kóterdi.«Beıbit ómirde mas kúıinde kólik basqarǵan jaýapsyz júrgizýshiler kinásinen joldarda adamdar qaza taýyp jatyr. Olardy aqtaýǵa bolmaıdy. Sondyqtan osyndaı zań buzýshylyqtar men qylmystar úshin olardyń saldarynyń aýyrlyǵyna teńbe-teń jaza bolýy tıis», - dedi IIM qyzmet basshylarymen ótkizgen keńesinde mınıstr Erlan Tuǵymbaev.
Jyl basynan beri polısııa qyzmetkerleri mas kúıde kólik júrgizgen 22 myńnan astam júrgizýshini anyqtady. Olardyń 17 myńnan astamy avtokólikti basqarý quqyǵynan aıyrý túrindegi ákimshilik jaýapkershilikke tartyldy. Júrgizýshilik quqyǵynan aıyrylǵan ári mas kúıde bolǵan 1 878 adam qylmystyq jaýapkershilikke tartyldy.
Sonymen birge statıstıka kórsetip otyrǵandaı, qoldanystaǵy ákimshilik jazalar júrgizýshilerdiń tártibine qajetti deńgeıde áser etpeıtinin jáne JKO sanynyń tómendemeı otyrǵanyn baıqatady.Mas kúıde kólik júrgizgeni úshin jazany qatańdatý barlyq jol qozǵalysyna qatysýshylardyń, júrgizýshilerdiń de, jolaýshylardyń da, sondaı-aq jaıaý júrginshilerdiń de qaýipsizdigin qamtamasyz etýge múmkindik beredi.
Qazirgi ýaqytta múddeli memlekettik organdarmen, depýtattyq korpýspen, jurtshylyqpen kelisiletin tıisti usynystar daıyndalýda.