Premer-Mınıstr A. Mamınniń tóraǵalyǵymen ótken Úkimettiń zań jobalaý jumystarynyń 2020 jylǵa arnalǵan josparynyń jobasy týraly Úkimet otyrysynda ádilet vıse-mınıstri N. Pan baıandama jasady. Bul týraly primeminister.kz habarlady.
Ádilet mınıstrligi Zań jobalaý qyzmeti máseleleri jónindegi vedomstvoaralyq komıssııa múshelerimen birlesip Úkimettiń zań jobalaý jumystarynyń 2020 jylǵa arnalǵan jospar jobasyn ázirledi.
Jospar jobasy Prezıdent pen memlekettiń strategııalyq qujattarynda aıqyndalǵan mindetter negizinde ázirlengen jáne 16 zań jobasyn ázirleýdi kózdeıdi. Olar áleýmettik qamsyzdandyrý, dene shynyqtyrý jáne sport, arnaıy memlekettik organdar qyzmetkerleri men áskerı qyzmetshilerdiń turǵyn úı qatynastary, erekshe taýarlardy baqylaý, kórneki aqparat jáne basqada salalardy odan ári damytýǵa baǵyttalǵan.
Aldaǵy jyly 2 jańa zań jobasyn ázirleý kózdelip otyr. Bul «Erekshe taýarlardy baqylaý týraly» jáne «О́simdik álemi týraly» zań jobalary. «Erekshe taýarlardy baqylaý týraly» Zań jobasyn jańa redaksııada ázirleý ulttyq eksporttyq baqylaý júıesin jetildirý, sondaı-aq ulttyq jáne óńirlik qaýipsizdikti qamtamasyz etýge baǵyttalǵan. «О́simdik álemi týraly» jańa zań jobasyn ázirleý ósimdikter dúnıesi obektilerin qorǵaý jáne paıdalaný salasyndaǵy qatynastardy retteýdi qamtamasyz etý, olardy tıimdi basqarý úshin jaǵdaı jasaý maqsatynda qajet.
Budan basqa, aldaǵy jyly Memleket basshysynyń 2019 jylǵy 2 qyrkúıektegi Qazaqstan halqyna Joldaýyn iske asyrý jónindegi Jalpyulttyq is-sharalar josparynan týyndaıtyn 2 zań jobasy Parlamentke engiziletin bolady.
Bul - halyqtyń barlyq jas toptary arasynda dene shynyqtyrý men buqaralyq sportty damytýǵa, balalar úshin sporttyq ınfraqurylymnyń barynsha qol jetimdiligin qamtamasyz etýge baǵyttalǵan zań jobasy. Jáne, jergilikti mańyzy bar áleýmettik-ekonomıkalyq mindetterdi sheshýde bıliktiń aýdandyq, qalalyq jáne aýyldyq deńgeıleriniń derbestigi men jaýapkershiligin keńeıtýdi kózdeıtin zań jobasy ázirlenetin bolady.
Jospar jobasynda kózdelgen 16 zań jobasynyń ishinen Parlamentke 2020 jyldyń birinshi jartyjyldyǵynda - 4, al ekinshi jartyjyldyǵynda - 12 zań jobasyn engizý josparlanýda.
Zań jobalaý jumystarynyń josparyn jasaý kezinde zań jobalaryn engizý merzimderi ázirleýshi memlekettik organdarmen usynyldy.
Indýstrııa jáne ınfraqurylymdyq damý mınıstrligi 3 zań jobasyn ázirleıdi. Qorǵanys, Ulttyq ekonomıka, Syrtqy ister, Mádenıet jáne sport, Ekologııa, geologııa jáne tabıǵı resýrstar, Eńbek jáne halyqty áleýmettik qorǵaý mınıstrlikteri 2 zań jobasynan ázirleıtin bolady. Qarjy mınıstrligi bir zań jobasyn ázirleıtin bolady.