Almaty qalasynda «Jas Sarbaz» qozǵalysynyń tárbıelenýshileri men áskerı-patrıottyq klýbtardyń quramyndaǵy balalar úshin alǵash ret áskerı-dalalyq jıyn ótkizildi. Bul týraly Qorǵanys mınıstrliginiń baspasóz qyzmeti habarlady.
Jas patrıottar úshin kedergiler jolaǵynan ótý, AK-74 avtomatynan atý, parashıýttik daıyndyq syndy tapsyrmalar berildi. Sonymen qatar kýrsanttar kavalerlyq jasaǵyn úıretetin bazaǵa bardy.
«№95 jáne 19 mektepterden, Mánshúk Mámetova atyndaǵy mektep-gımnazııadan, №1 oblystyq balalar úıindegi «Jas Sarbaz» qozǵalysynyń tárbıelenýshileri úshin jıyn óte qarqyndy ótti»,- dedi "Kırov" áskerı-patrıottyq klýbynyń jetekshisi Baqytjan Perimbet.
Jıynda eń jas qatysýshylar 5-synyp oqýshylary boldy. О́z jasyna qaramastan, olar barlyq tapsyrmalardy nusqaýshy-oqytýshylar quramynyń baqylaýymen senimdi oryndady.
Áskerı-dalalyq jıyn QRQM Almaty Qorǵanys jumystary jónindegi departamenti men Áskerı-tehnıkalyq mekteptiń qoldaýymen uımdastyryldy.
«Bizdiń áskerı-patrıottyq klýbymyz 5 jyldan astam ýaqyt boıy jumys istep keledi. Almaty qalasy qorǵanys isteri Departamentiniń tikeleı qatysýymen qyzyqty is-sharalar tek áskerı-patrıottyq klýbtarda ǵana emes, balalar úıinde de ótkiziledi. Bizdiń klýbta balalar úıiniń tárbıelenýshileri taý-alpınıstik daıyndyqpen aınalysady", dedi Baqytjan Perımbetov.
Almaty qalasynyń №95 jalpy bilim berý mektebiniń dırektory Aınur Sabırovanyń aıtýynsha, «Jas Sarbaz» synybynyń ashylýy jáne balalardyń osyndaı is-sharalarǵa qatysýy mekteptiń kóńil-kúıine tikeleı áser etedi. «Oqýshylardyń aldynda úlgi kadetter men jas sarbazdar árqashan úlgi bolmaq ", dep atap ótti ol.