Mańǵystaý oblystyq salaýatty ómir saltyn qalyptastyrý problemalarynyń ortalyǵy oblystyq densaýlyq saqtaý basqarmasynyń tapsyrmasy boıynsha medısına qyzmetkerleri úshin semınarlar men «Medısına jáne sybaılas jemqorlyq úılespeıdi» áleýmettik mańyzdy jobasyn iske asyrý boıynsha halyqpen kezdesýler uıymdastyrdy. Bul týraly Mańǵystaý oblysy densaýlyq saqtaý basqarmasy baspasóz qyzmeti habarlady.
Qoǵamdyq densaýlyq saqtaý ınstıtýtynyń ókili Arslan Indershıevtiń aıtýynsha, jobany júzege asyrý bıylǵy jyldyń qazan aıynda bastaldy. - Mańǵystaý oblysynyń sybaılas jemqorlyqqa qarsy qyzmetimen birlesip, biz densaýlyq saqtaý salasynda qoldanylatyn sybaılas jemqorlyqqa qarsy zańnamanyń negizgi qaǵıdattaryn túsindirý boıynsha is-sharalar júrgizemiz. Medısınalyq qyzmetkerlermen kezdesýler uıymdastyryldy, onda biz qoldanystaǵy zańnama, quqyqqa qarsy áreketterdiń saldary týraly aıtyp beremiz. Sonymen qatar, biz oblys halqymen — aýrýhanalar men emhana uıymdarynyń naýqastarymen kezdesemiz, onda sybaılas jemqorlyqqa qarsy zańnamanyń negizgi aspektileri týraly aıtyp, zańǵa qaıshy áreketterge barmaýǵa, medısına qyzmetkerlerine para jáne syılyqtar bermeýge shaqyramyz. Eki aılyq eseptik kórsetkishten asatyn nárse zańǵa qaıshy áreket bolyp sanalady. Densaýlyq saqtaý basqarmasy júıeli túsindirý jumystaryn júrgizý úshin osyndaı áleýmettik mańyzdy jobaǵa bastama jasady, - dep túsindirdi Arslan Indershıev.
Medısına qyzmetkerlerine arnalǵan semınarlar jáne turǵyndar úshin Ashyq esik kúnderi Aqtaý qalalyq №1 jáne №2 emhanalarynda, Mańǵystaý oblystyq aýrýhanasynda ótkizildi. Oblystyq sybaılas jemqorlyqqa qarsy qyzmettiń ókilderi naýqastar arasynda dárigerlerdiń bopsalaýy jáne medısınalyq qyzmet úshin para alýdyń aldyn alý týraly túsindirme jumystary men saýalnamalar uıymdastyrdy. Arslan Indershıevtiń aıtýynsha, saýalnama barysynda uıymdastyrýshylar oblys turǵyndarynyń sybaılas jemqorlyq, bopsalaý, para alý faktilerimen kezdeskenin, bireýler olardy osy áreketterge ıtermelegen be, joq pa jáne olar oǵan qalaı qaraıtynyn anyqtaıdy. - Bizge halyqtyń densaýlyq saqtaý salasyndaǵy quqyqqa qarsy áreketterge qanshalyqty daıyn ekenin túsiný mańyzdy. «Medısına jáne sybaılas jemqorlyq úılespeıdi» jobasynyń sońynda biz barlyq málimetterdi saraptap, jyl sońynda oblystyq densaýlyq saqtaý basqarmasyna tapsyramyz, dep atap ótti Arslan Indershıev.
Medısına qyzmetkerlerine arnalǵan semınarlar men halyqpen kezdesýler Mańǵystaý oblysynyń qalalary men aýdandarynda ótedi.
Mańǵystaý oblysy